सावध रहा! चंद्रपूर जिल्हातील भद्रावतीत मिळाला डेल्टाचा रुग्ण

आयशा - आमचा विदर्भ प्रतिनिधी

नागपूर -

'डेल्टा प्लस'चा एक रुग्ण चंद्रपूर जिल्ह्यातील भद्रावतीमध्ये आढळून आला आहे. सध्या हा रुग्ण पूर्णपणे बरा झाल्याची माहिती आरोग्य विभागाने दिली आहे. हा रुग्ण १७ जुलैला केलेल्या चाचणीतून पॉझिटिव्ह आला होता. त्याला घरीच विलगीकरणात ठेवून संपर्कात आलेल्यांच्या चाचण्या करण्यात आल्या. मात्र कुणीही बाधित आढळला नाही.

विदर्भात मृत्युसंख्या शून्यावर

विदर्भात करोनाच्या रुग्णसंख्येत सातत्याने घट नोंदविली जात आहे. काही जिल्हे करोनामुक्तीच्या वाटेवर असतानाच बुधवारी ३१ नवे बाधित आढळून आले. उपचारानंतर ५४ रुग्णांनी करोनावर मात केली. तर अकरा जिल्ह्यांत कुठेही मृत्यूची नोंद झाली नाही. ही बाब आरोग्य प्रशासनासाठी दिलासादायक मानली जात आहे. जिल्हानिहाय आढळलेल्या रुग्णांमध्ये नागपूर पाच, अकोला, तीन, वर्धा एक, चंद्रपूर दोन, वाशीम दोन, बुलडाणा सहा, अमरावती चार तर गडचिरोली जिल्ह्यात पाच करोनाबाधित रुग्ण आढळले आहेत. आजवर विदर्भात ११लाख १८ हजार ७५९ बाधित आढळले आहेत. यातील १० लाख ९६ हजार ९५३ रुग्णांना उपचारानंतर सुटी देण्यात आली. मात्र २१ हजार २२८ रुग्णांचा मृत्यू झाला. डेल्टा प्लसच्या पार्श्वभूमीवर प्रशासकीय पातळीवर आवश्यक सर्व उपाय योजले जात आहेत.