शेतकऱ्यांने विष प्राशन करून केली आत्महत्या

धनराजसिंह शेखावत - आमचा विदर्भ प्रतिनिधी

गडचांदुर -

कोरपना तालुक्यातील निमणी येथील शेतकऱ्यांने विष प्राशन करून आत्महत्या केल्याची घटना  उघडकीस आली आहे. बुधवारला सकाळी ११ वाजता ही घटना उघडकीस आली गजानन सदाशिव गौरकार वय ५५ असे मृत शेतकऱ्याचे नाव आहे.

स्वतःच्या ४ एकर शेतीत कापूस तूर व भाजीपाल्याचे उत्पन्न घेऊन परिवारांचा उदरनिर्वाह चालविणाऱ्या गजानन गौरकार या शेतकऱ्यांनी सततच्या नापिकी, आर्थिक संकट, सावकारी कर्जाच्या विवंचनेतून स्वतःच्या राहत्या घरी कॉन्फिडॉर नावाचे किटकनाशक विष प्राशन केलें असता त्यांना ग्रामीण रुग्णालय गडचांदूर येथे भरती करण्यात आले. मात्र प्रकृती खालावल्याने तेथील डाँक्टरांनी त्यांना जिल्हा रुग्णालय चंद्रपूर येथे रेफर केले. अतिदक्षता विभागात २ वाजता डॉक्टरांच्या चमूने मृत घोषित केल्याची माहिती दिली त्यांच्या मागे आई, पत्नी, मुलगा, दोन मुली असा बराच मोठा आप्त परिवार आहे. या घटनेमुळे निमणी गावात शोककळा पसरली असून बुधवारला सायंकाळी ८ वाजता मालटोकणी नाल्यावर त्यांच्यावर अंत्यसंस्कार करण्यात आले.