विनाकारण फिरणाऱ्या १२५ जणांची 'अँटिजेन' चाचणी

• नाका नं.३ येथे आरोग्य पथक, पोलीस प्रशासनाची संयुक्त तपासणी मोहीम

विरेंद्र पुणेकर - आमचा विदर्भ तालुका प्रतिनिधी (ग्रामीण)

राजुरा -

कोरोनाच्या पार्श्वभूमीवर नियमांकेड दुर्लक्ष करून रस्त्यावर निष्कारण फिरणाऱ्यांवर तीव्र कारवाई करण्यात येत आहे. स्थानिक नाका नंबर ३ परिसरात आज सकाळी ११ ते दुपारी २ च्या दरम्यान १२५ जणांना थांबवून त्यांची आरोग्य पथकाकडून अँटिजेन चाचणी करण्यात आली.

कोरोनाची साखळी तोडण्यासाठी डॉक्टर, पोलीस तसेच स्थानिक प्रशासन विविध उपाययोजना राबवत आहे. मात्र, त्याला काही नागरिक प्रतिसाद देत नसल्याने दिसत आहे. विना मास्क फिरणाऱ्या नागरिकांवर सुरुवातीपासून दंडात्मक कारवाई केली जात आहे. मात्र, तरीही निष्कारण फिरणाऱ्यांची संख्या नियंत्रणात येत नसल्याने त्यांची अँटिजेन चाचणी करून पॉझिटिव्ह आढळल्यास सरळ रुग्णालयात दाखल केले जात आहे.

आज पोलिसांनी नका नं. ३ येथे वाहनांची चौकशी केली. या वेळी १२५ जणांना बाहेर फिरण्याचे ठोस कारण सांगता आले नाही. त्यामुळे आरोग्य केंद्राच्या पथकाकडून त्यांची जागेवरच अँटिजेन चाचणी करण्यात आली. या तपासणी दरम्यान एक जण पॉझिटिव्ह आढळला. पॉजिटीव्ह ला चंद्रपूर येथील कोव्हिड सेंटरमध्ये पाठविण्यात आले आहे. 

बंदोबस्तादरम्यान अँटिजेन तपासणी मोहिमेत पोलिस उपनिरीक्षक पी.आर. साखरे, सहायक फौजदार भासरकर, प्रशांत येडे, पोलीस हवालदार राधेश्याम यादव, पोलीस शिपाई नायक, उमेश रामटेके, हेमंत बावणे, लुटारू सोयाम, सोबतच होम गार्ड तसेच आरोग्य विभागाकडून लॅब टेक्निशियन अवि पचारे, रोहित जामदार व त्यांची मोबाईल टीम यांनी कारवाई केली.