भारतीय कोयला खदान मजदूर संघ कामगारांचा हितासाठी नेहमी संघर्षरत - सुधीर घुरडे

आमचा विदर्भ - ब्युरो रिपोर्ट्स

राजुरा -

भारतीय कोयला खदान मजदूर संघ कामगारांचा हितासाठी नेहमी संघर्ष करीत असून भविष्यातही संघर्ष करीत राहणार आहे, या संघटनेत स्थानिक पातळीवर काम करण्याऱ्याबद्दल नेहमीच आदर असतो म्हणूनच माझ्या सारख्या सामान्य खाण कामगार पासून भारतीय कोयला खदान मजदूर संघाचे केंद्रीय महामंत्री ते वेजबोर्ड सदस्य पर्यंत या कामगार संघात मला स्थान मिळाले हा फक्त माझा सन्मान नाही हा सर्व कामगारांचा सन्मान आहे. तुमच्या माझ्यावर विश्वास आणि समर्पणामुळेच मला हा सन्मान मिळाला आहे असे प्रतिपादन भारतीय कोयला खदान मजदूर संघाचे केंद्रीय महामंत्री सुधीर घुरडे यांनी केले ते सास्ती टाऊनशिप येथे आयोजित सत्कार कार्यक्रमात बोलत होते. 

भारतीय कोयला खदान मजदूर संघाचा वतीने बल्लारपूर क्षेत्रातील सास्ती टाऊनशिप येथील कार्यालयात भारतीय कोयला खदान मजदूर संघाचे केंद्रीय महामंत्री सुधीर घुरडे यांचे नांव (जेबीसीआय) अकराव्या वेतन करारामध्ये नामांकन मिळाल्याबद्दल त्यांचा गौरव करण्यात आला यावेळी ते बोलत होते. 

सुधीर घुरडे यांनी म्हटले कि, मागील वेतन मंडळामध्ये सामाजिक सुरक्षा सुविधेकडे दुर्लक्ष केल्याने अपेक्षेप्रमाणे पगार वाढला नाही. यावेळी सर्व बाबींकडे बारकाईने विचार करून सक्षम तोडगा काढण्यासाठी प्रयत्न केले जातील. केंद्र सरकार कामगार न्यायालय लागू करून वेतन आयोग लागू करण्याच्या प्रक्रियेत आहे. असे झाल्यास कामगारांना फारसा फायदा होणार नाही. माझ्या व संघटनेच्या वतीने बैठकीची फेरी सुरू करुन वेतन मंडळाचा निर्णय लवकरात लवकर घेण्याचा प्रयत्न केला जाईल. परंतु यासाठी इतर संघटनेचे सहकार्यही तितकेच महत्वाचे आहे. सरकारने कोल इंडियामध्ये एफडीआय आणला होता परंतु अखिल भारतीय मजदूर संघाचा वतीने संपूर्ण कोल इंडियामध्ये देशव्यापी संपामुळे सरकारचा हेतू अयशस्वी झाला. असेही घुरडे म्हणाले. 

या सत्कार समारंभात प्रमुख पाहुणे म्हणून पी.बी. पाटील, जोगेंद्र यादव, विवेक अल्लेवार प्रामुख्याने उपस्थित होते. कार्यक्रमाच्या यशस्वितेकरिता शांताराम वांढरे, बादल गर्गेलवार, अनिल निब्रड, मारोती नन्नावरे, प्रदीप गाऊत्रे यांनी परिश्रम घेतले.