वेकोलि धोपटाला प्रोजेक्ट - ९ वर्षांपासून नोकरी तर नाहीच पण जमिनीचा मोबदला सुद्धा नाही

• २६ मार्च पासून खदान बंद आंदोलन
• सास्ती - कोलगांव येथील संतप्त प्रकल्पग्रस्तांचा इशारा

अनिल गंपावार - आमचा विदर्भ तालुका प्रतिनिधी

राजुरा -

वेकोलि बल्लारपूर क्षेत्रातील धोपटाला प्रोजेक्ट करिता शेतकऱ्यांच्या जमिनी संपादित करण्यात आल्या. मात्र अद्यापही प्रकल्पग्रस्त शेतकऱ्यांना आश्वासनाप्रमाणे नोकरीतर सोडाच मोबदला सुद्धा देण्यात आला नाही. त्यामुळे २६ मार्च पासून प्रकल्पग्रस्तांनी खदानीचे काम बंद पाडून आंदोलनाचा इशारा दिला आहे. या आशयाचे निवेदन प्रकल्पग्रस्तांनी प्रशासनाला दिले असून रेंगाळलेल्या या प्रोजेक्ट मुळे प्रकल्पग्रस्त पुरते हवालदिल झाले आहे. 

धोपटाला प्रोजेक्ट करिता २०१२ मध्ये सेक्शन लागू करण्यात आला होता २०१५ मध्ये सेक्शन पुर्णत्वात आला. ९ वर्षे झाली तरी जमिनीचा मोबदला नाही तर नोकरीही नाही अशी अवस्था शेकडों प्रकल्पग्रस्तांची झाली आहे. रेंगाळलेल्या या प्रोजेक्टचा मोबदला न मिळाल्यामुळे कुटुंबियांचे पालन-पोषण, मुलांचे शिक्षण, मुलींचे लग्न कसे उरकवावे असा प्रश्न प्रकल्पग्रस्तांसमोर उभा ठाकला आहे. 

जमिनीचा मोबदला व नोकरी संदर्भात विचारपूस करण्याकरिता महाप्रबंधक कार्यालयात प्रकल्पग्रस्त जात असता कार्यालय अधिकारी उद्धट भाषेत उडवा उडवीची उत्तरे देतात असा आरोप प्रकल्पग्रस्तांनी लावला आहे. २६ मार्च पर्यंत मोबदला व नोकरी संदर्भात निर्णय न झाल्यास सास्ती येथील कोळसा खदानीचे काम पूर्णतः बंद पाडण्याचा इशारा कोलगावचे सरपंच अनिता सुधाकर पिंपळकर, उपसरपंच पुरुषोत्तम लांडे, सास्ती चे सरपंच रमेश पेटकर, उपसरपंच कुणाल कुडे, प्रकाश भटारकर, किशोर कुडे, विलास घटे, प्रभाकर नळे, विलास भटारकर व शेकडो धोपटाला, सास्ती व कोलगांव येथील प्रकल्पग्रस्तांनी दिला आहे.