धनगर समाजाच्या न्याय्य हक्कांसाठी राजुरातून शासनाला साकडे

आरक्षणासह चार प्रमुख मागण्यांचे निवेदन नायब तहसीलदारांकडे

आमचा विदर्भ - अनंता गोखरे 

राजुरा (दि. ०८ सप्टेंबर २०२६) -

        महाराष्ट्रातील धनगर जमातीच्या प्रलंबित व न्याय्य मागण्यांकडे शासनाचे लक्ष वेधण्यासाठी राजुरा धनगर समाजाच्या वतीने आज स्थानिक तहसील कार्यालयात निवेदन सादर करण्यात आले. नायब तहसीलदार तेलंग यांनी निवेदन स्वीकारले. धनगर आरक्षणासह समाजाच्या विविध महत्त्वपूर्ण मागण्यांवर शासनाने तातडीने सकारात्मक निर्णय घ्यावा, अशी मागणी यावेळी करण्यात आली.

        धनगर समाजाच्या निवेदनातील प्रमुख मागणी धनगर आरक्षणाशी संबंधित आहे. सर्वोच्च न्यायालयात सुरू असलेली विशेष अनुज्ञा याचिका महाराष्ट्र शासनाने पूर्ण ताकदीने आणि गांभीर्याने लढावी, अशी मागणी करण्यात आली आहे. ८ सप्टेंबर २०२६ पूर्वी धनगर आरक्षणाच्या समर्थनार्थ ठोस, सकारात्मक तसेच सर्व कायदेशीर व घटनात्मक बाबी स्पष्ट करणारे प्रतिज्ञापत्र सर्वोच्च न्यायालयात दाखल करावे, अशी मागणी निवेदनातून करण्यात आली.

        तसेच या प्रकरणात धनगर समाजाची बाजू प्रभावीपणे मांडण्यासाठी शासनाने अनुभवी आणि सक्षम वकिलांची नियुक्ती करावी, अशी मागणीही करण्यात आली आहे. धनगर ST आरक्षणाबाबत कोणताही प्रतिकूल निर्णय झाल्यास समाजातील पात्र व्यक्तींना ST प्रमाणपत्र मिळण्यासाठी शासनाने पर्यायी ‘प्लॅन बी’ तयार ठेवावा, अशी मागणी करण्यात आली.

संत बाळूमामा देवस्थानासाठी स्वतंत्र कायद्याची मागणी

        श्री संत बाळूमामा देवस्थानासाठी विशेष शासकीय कायदा करण्यात यावा, अशी मागणीही धनगर समाजाने केली आहे. देवस्थानच्या विश्वस्त मंडळामध्ये किमान २१ विश्वस्त असावेत तसेच अध्यक्षपद धनगर समाजातील व्यक्तीस देण्यात यावे, अशी भूमिका निवेदनातून मांडण्यात आली.

मिसिंग लिंकला शिंग्रोबा धनगर यांचे नाव देण्याची मागणी

        मुंबई-पुणे एक्स्प्रेसवेवरील Missing Link ला स्वातंत्र्यवीर शिंग्रोबा धनगर यांचे नाव देण्यात यावे, अशी मागणी धनगर समाजाच्या वतीने करण्यात आली आहे. समाजाच्या ऐतिहासिक योगदानाची दखल घेत या प्रकल्पाला शिंग्रोबा धनगर यांचे नाव देण्याची मागणी करण्यात आली.

चर्चगेट रेल्वे स्थानकाचे अहिल्यादेवी होळकर नामकरण

        मुंबईतील चर्चगेट रेल्वे स्थानकाला पुण्यश्लोक अहिल्यादेवी होळकर यांचे नाव देण्यात यावे, अशी आणखी एक प्रमुख मागणी निवेदनातून करण्यात आली. या मागण्यांवर शासनाने तातडीने सकारात्मक निर्णय घेऊन धनगर जमातीला न्याय द्यावा, अशी विनंती करण्यात आली.

        निवेदन देताना राजुरा धनगर समाजाचे अध्यक्ष गोपाळराव बुरांडे, एकनाथ खडसे, राजुरा धनगर समाजाचे माजी अध्यक्ष विठ्ठल येवले, अनंता गोखरे, मधुकर गाडगे, बंडू पोतले, संतोष दवडे, बाळू कापडे, दिनेश पोतले, दशरथ धवने, सुभाष चिडे यांच्यासह इतर समाजबांधव उपस्थित होते.

#DhangarSamaj #DhangarReservation #DhangarSTReservation #DhangarCommunity #Rajura #RajuraNews #Chandrapur #ChandrapurNews #MaharashtraNews #DhangarAarakshan #SantBalumama #AhilyadeviHolkar #ShingrobaDhangar #Churchgate #MumbaiPuneExpressway #RajuraDhangarSamaj #MaharashtraNews #VidarbhaNews #AamchaVidarbha