चारित्र्याच्या संशयातून पत्नीचा खून; आरोपी पतीला न्यायालयाची कठोर शिक्षा

प्रत्यक्षदर्शी पुरावे आणि सीए रिपोर्टच्या आधारे दोष सिद्ध

आमचा विदर्भ वृत्तसेवा 

कोठारी (दि. ०९ मे २०२६) -

        चारित्र्यावर संशय घेऊन पत्नीची निर्घृण हत्या करणाऱ्या आरोपी पतीला जिल्हा व सत्र न्यायालय, चंद्रपूर यांनी आजीवन सश्रम कारावास अर्थात जन्मठेप आणि ३ हजार रुपये दंडाची शिक्षा सुनावली आहे. मा. अतिरिक्त जिल्हा व सत्र न्यायाधीश प्रकाश कदम (डीजे-१) यांनी मे २०२६ मध्ये हा महत्वपूर्ण निकाल दिला. या निकालामुळे कोठारी पोलिसांच्या तपासाला मोठे यश मिळाले आहे. ही घटना १२ सप्टेंबर २०२४ रोजी गोंडपिपरी तालुक्यातील मौजा कुडेसावली येथे सकाळी ८ ते ८.३० वाजताच्या सुमारास घडली होती. या प्रकरणातील आरोपी धनपाल माधव रामटेके (वय ६० वर्ष) याने पत्नी वंदना धनपाल रामटेके (वय ६० वर्ष) हिच्या चारित्र्यावर संशय घेत चाकूने वार करून तिची हत्या केली होती. या घटनेमुळे परिसरात मोठी खळबळ उडाली होती.

         या प्रकरणी फिर्यादी अमर धनपाल रामटेके (वय ३० वर्ष) यांच्या तक्रारीवरून कोठारी पोलीस स्टेशनमध्ये गुन्हा नोंद करण्यात आला होता. त्यानंतर कोठारी पोलीस स्टेशनचे सपोनी योगेश खरसान यांनी प्रकरणाचा सखोल तपास सुरू केला. तपासादरम्यान पोलिसांनी घटनास्थळ पंचनामा, प्रत्यक्षदर्शी साक्षीदारांचे जबाब, वैद्यकीय अहवाल तसेच केमिकल अॅनालायझर (सीए) रिपोर्ट यांसारखे महत्त्वाचे पुरावे संकलित केले. तपास पूर्ण झाल्यानंतर आरोपीविरुद्ध न्यायालयात दोषारोपपत्र दाखल करण्यात आले.

        खटल्याच्या सुनावणीदरम्यान सरकारी अभियोक्ता आसिफ शेख यांनी न्यायालयात भक्कम युक्तिवाद केला. सादर करण्यात आलेले प्रत्यक्षदर्शी पुरावे, वैद्यकीय अहवाल आणि वैज्ञानिक तपास अहवाल ग्राह्य धरत न्यायालयाने आरोपी धनपाल रामटेके याला दोषी ठरवले. न्यायालयाने भारतीय न्याय संहिता (BNS) कलम १०३(१) अंतर्गत आरोपीला आजीवन सश्रम कारावास आणि ३ हजार रुपये दंडाची शिक्षा सुनावली. तसेच दंड न भरल्यास एक महिना साधा कारावास भोगावा लागणार असल्याचेही न्यायालयाने स्पष्ट केले. या प्रकरणाच्या तपासात सपोनी योगेश खरसान यांनी महत्त्वाची भूमिका बजावली. तर पैरवी अधिकारी म्हणून मपोशि मनीषा गोवर्धन चिवंडे यांनीही प्रभावी कामगिरी बजावत खटल्याच्या सुनावणीत महत्त्वाची भूमिका पार पाडली.

#KothariPolice #ChandrapurCourt #MurderCase #LifeImprisonment #CrimeNews #ChandrapurNews #Gondpipri #Kudesaoli #PoliceInvestigation #MaharashtraCrime #CourtVerdict #WifeMurderCase #कोठारीपोलीस #चंद्रपूर #गुन्हेवार्ता #जन्मठेप #न्यायालय #पत्नीहत्या #महाराष्ट्रबातम्या #क्राईमन्यूज #chandrapurnews #chandrapurcity #chandrapur #aamchavidarbha #vidarbha