सोनोग्राफी सेवेसाठी राजुरा रुग्णालयात कायमस्वरूपी डॉक्टर नेमण्याची मागणी

निवेदनाद्वारे जिल्हा प्रशासनाचे लक्ष वेधले

आमचा विदर्भ - दीपक शर्मा 

राजुरा (दि. ०६ मे २०२६) -

        तालुक्यातील तसेच ग्रामीण व आदिवासी भागातील नागरिकांसाठी महत्त्वाचे असलेले राजुरा उपजिल्हा रुग्णालय सध्या मूलभूत आरोग्य सेवांच्या कमतरतेचा सामना करत आहे. विशेषतः कायमस्वरूपी सोनोग्राफी तज्ज्ञ उपलब्ध नसल्यामुळे गर्भवती महिला, ज्येष्ठ नागरिक आणि इतर रुग्णांना तपासणीसाठी खासगी रुग्णालयांचा आधार घ्यावा लागत असून त्यातून आर्थिक व मानसिक ताण वाढत आहे. ही गंभीर समस्या लक्षात घेऊन नगरसेवक भूपेश मेश्राम व उमेश गोरे यांनी जिल्हा शल्य चिकित्सक यांच्याकडे निवेदन सादर करून तातडीने कायमस्वरूपी सोनोग्राफी तज्ज्ञाची नियुक्ती करण्याची मागणी केली आहे. शासनाच्या आरोग्य धोरणानुसार ग्रामीण भागातील रुग्णांना दर्जेदार सेवा मिळणे आवश्यक असताना अशी परिस्थिती निर्माण होणे चिंतेची बाब असल्याचे त्यांनी नमूद केले.

         रुग्णालयात आवश्यक तज्ज्ञ डॉक्टर नसल्याने नागरिकांना चंद्रपूर किंवा इतर शहरांकडे धाव घ्यावी लागत आहे. यामुळे वेळ, पैसा आणि आरोग्य या तिन्ही बाबींवर परिणाम होत आहे. विशेषतः गर्भवती महिलांसाठी ही बाब धोकादायक ठरत असल्याची प्रतिक्रिया स्थानिकांनी व्यक्त केली. निवेदन देताना प्रदीप मोरे, रवी आत्राम, विवेक राठोड, आकाश तोळसे, रवी वाढई, सागर नरेलवार, राजू कामटे व इतर कार्यकर्ते उपस्थित होते. सामान्य जनतेच्या आरोग्याशी संबंधित हा प्रश्न तातडीने सोडवून राजुरा उपजिल्हा रुग्णालयात कायमस्वरूपी सोनोग्राफी तज्ज्ञ नेमण्यात यावा, अशी मागणी नागरिकांकडूनही होत आहे.

#Rajura #Chandrapur #HealthcareCrisis #PublicHealthIndia #SonographyDoctor #RuralHealthcare #MaharashtraNews #BJP #OBCMorcha #HealthForAll #HospitalIssues #RajuraNews #HealthcareDemand #MedicalFacilities #BreakingNews #chandrapurnews #chandrapurcity #chandrapur #aamchavidarbha #vidarbha