सोनिया गांधी महाविद्यालयात सावित्रीबाई फुले जयंती उत्साहात साजरी

क्रांतिज्योती सावित्रीबाई फुले यांच्या विचारांचा विद्यार्थ्यांना संदेश

आमचा विदर्भ - अनंता गोखरे

राजुरा (दि. ०७ जानेवारी २०२६) -

         स्थानिक सोनिया गांधी कनिष्ठ महाविद्यालय व सोनिया गांधी इंग्लिश पब्लिक स्कूल येथे क्रांतिज्योती सावित्रीबाई फुले यांची जयंती उत्साहपूर्ण वातावरणात साजरी करण्यात आली. शिक्षण, समानता आणि सामाजिक न्यायाचा संदेश देणाऱ्या या कार्यक्रमाला विद्यार्थी, शिक्षक व शिक्षकेतर कर्मचारी मोठ्या संख्येने उपस्थित होते. 

         या जयंती सोहळ्याच्या प्रमुख पाहुण्या जेष्ठ अध्यापिका अमृता धोटे या उपस्थित होत्या. कार्यक्रमाच्या अध्यक्षस्थानी संस्था प्रतिनिधी रजनी शर्मा उपस्थित होत्या. यावेळी सोनिया गांधी इंग्लिश पब्लिक स्कूलच्या प्राचार्या कृतिका सोनटक्के, मुख्याध्यापिका शबनम अन्सारी, उपप्राचार्या ज्योत्सना वनकर, शिक्षिका प्रेमिला रोगे यांची प्रमुख उपस्थिती होती.

        कार्यक्रमात विद्यार्थ्यांना मार्गदर्शन करताना जेष्ठ अध्यापिका अमृता धोटे म्हणाल्या की, महिला शिक्षणाची मुहूर्तमेढ रोवणाऱ्या सावित्रीबाई फुले यांनी प्रतिकूल परिस्थितीत शिक्षणाचा दिवा पेटवला. त्यांचा शैक्षणिक व सामाजिक वारसा पुढे नेणे ही आजच्या पिढीची सामूहिक जबाबदारी आहे. शिक्षणातूनच समाज परिवर्तन शक्य असून विद्यार्थ्यांनी सावित्रीबाईंच्या विचारांचा आदर्श जीवनात उतरवावा, असे आवाहन त्यांनी केले.

        कार्यक्रमात विविध सांस्कृतिक व वैचारिक उपक्रमांचे आयोजन करण्यात आले. जयश्री ढोबळे यांनी सादर केलेल्या गीताने उपस्थितांना मंत्रमुग्ध केले. ओजस्वी दिवे व नियती उपरे यांनी सादर केलेल्या समूहगीताला उपस्थितांकडून भरभरून दाद मिळाली. पल्लवी आदे यांनी सादर केलेले “मी सावित्री बोलते” हे प्रभावी सादरीकरण विशेष आकर्षण ठरले.

        कार्यक्रमाचे संचालन नंदिनी मोरे व अफ्शा कुरेशी यांनी संयुक्तपणे केले. कु. गौरी देव्हारे हिने आभार प्रदर्शन करून कार्यक्रमाची सांगता केली. या कार्यक्रमातून विद्यार्थ्यांमध्ये सावित्रीबाई फुले यांच्या विचारांची, स्त्री शिक्षणाची व सामाजिक समतेची प्रेरणा निर्माण झाली असल्याची भावना उपस्थितांनी व्यक्त केली. या प्रसंगी शिक्षक, विद्यार्थी तसेच शिक्षकेतर कर्मचारी मोठ्या संख्येने उपस्थित होते. संपूर्ण कार्यक्रम शिस्तबद्ध व प्रेरणादायी वातावरणात पार पडला.

#SavitribaiPhuleJayanti #WomenEducation #EducationForAll #SocialReform #StudentInspiration #SchoolNews #CollegeEvent #MaharashtraEducation #PhuleThoughts #SoniaGandhiCollege #chandrapurnews #chandrapurcity #chandrapur #aamchavidarbha #vidarbha