उमेदवारांची ‘गिफ्ट राजकारण’ स्पर्धा, मतदारांची दिशाभूल

एका रात्रीच्या पार्टीसाठी पाच वर्षांचा विकास गहाण

निवडणुकीत रात्रीच्या पार्ट्याने उद्याचा विकास गायब?

आमचा विदर्भ - दीपक शर्मा

राजुरा (दि. २३ नोव्हेंबर २०२५) -

        नगर परिषद निवडणुकीची धामधूम सुरू असताना शहरातील राजकारणाला अक्षरशः नवीन ऊन ऊब मिळाली आहे. शहरात उमेदवारांचे दरवाजे ठोठावण्याचे प्रमाण जरी वाढले असले, तरी मतदारांच्या डोळ्यांपुढे मात्र चमचमते प्रलोभन आणि आमिषांची झिरमिळ दिसू लागली आहे. पदाधिकारी आणि उमेदवारांच्या नावाखाली मतदारांना दिल्या जाणाऱ्या ऑफरची चलती एवढी वाढली की काही मतदारांना वाटायला लागलं, “ही निवडणूक आहेत की नववर्ष सेलची मोठी बाजारपेठ?”

        निवडणुकीच्या पार्श्वभूमीवर काही उमेदवारांनी तर मतदारांच्या घरातील इतर शहरात नोकरी-शिक्षणाला गेलेल्या मुलांचेही राजकीय ‘कल्याण’ पाहण्याचा व्याप घेतला आहे. पदाधिकारी आणि उमेदवार आपल्या ओळखीने आणि आर्थिक शक्तीने चर्चेत आहेत. कुणी म्हणतात, “भाऊ, मुलाला दुसऱ्या गावातून आणायचंय? खर्च आमचा!” यानिमित्याने का होईना आपल्या अपत्यांचे दर्शन कुटुंबियांना लाभणार आहे का? तर कुणी रात्रीच्या पहाटेपर्यंत थंडी विसरून पार्ट्यांचे पान-थाल उघडे ठेवतात. काही उमेदवार तर महागड्या वस्तू, आकर्षक गिफ्ट, बॅगा, मोबाईल, साडी-धोतर आणि बघावं तेवढं देण्यास तयार आहेत. “किती पाहिजे बोल!” असा आत्मविश्वासी आवाज ऐकू येताच वाटतं की ही निवडणूक नाही तर जणू मतांचा खुला बाजारच आहे. परंतु यावेळी खरा प्रश्न उपस्थित होतो, जे मतदार पैशाच्या, वस्तूंच्या आणि दारूच्या मोहात मतदान करतात, त्यांच्या परिसराचा विकास कधीच होत नाही. कारण ज्या उमेदवाराने मत विकत घेतले, तो जिंकल्यानंतर मतदारांचं नाही तर त्याने केलेल्या ‘गुंतवणुकीचं’ परतफेडीतच रमून जातो. रस्ता, नाली, पाणी, अंगणवाडी, दिवे, स्वच्छता… हे सगळे विषय मग पाच वर्षे याच पिशवीत झोपून राहतात.

        मतदारांना आमिष देणाऱ्या उमेदवारांचा समाचार घेताना हे स्पष्ट दिसतं की निवडून आल्यानंतर सर्वात आधी गायब होणारी वस्तू म्हणजे उमेदवारांची जबाबदारी आणि मतदारांची आशा. या निवडणुकीत मतदारांसाठी सर्वात मोठा सवाल असा की, “काय हवं? काही दिवसाचा फायदा, की पाच वर्षांचा विकास?”

#ElectionReality #VoteWisely #StopVoteBuying #PowerOfVote #MyVoteMyFuture #NoMoreCorruption #SmartVoters #CleanPolitics #LocalElection2025 #DemandDevelopment #chandrapurnews #chandrapurcity #chandrapur #aamchavidarbha #vidarbha