रमाबाई नगरात महिलेचा खून, अज्ञात आरोपी फरार

रमाबाई नगरात महिलेचा खून, अज्ञात आरोपी फरार

अज्ञात मारेकऱ्याचा शोध सुरु

आमचा विदर्भ - ब्युरो रिपोर्ट्स

राजुरा (दि. 16 जून 2025) -

        शहरातील रमाबाई नगर परिसरात रविवारी सकाळी घडलेल्या एका हृदयद्रावक घटनेने परिसरात खळबळ उडाली. श्रीमती कविता रायपुरे (वय 55) या महिलेला अज्ञात व्यक्तीने अत्यंत क्रूरपणे ठार मारल्याची घटना आज सकाळी उघडकीस आली. घटना सकाळीच्या सुमारास समोर आली, जेव्हा कविता रायपुरे यांच्या विवाहित मुलीने, ममता अलोणे हिने, दरवाजात टकटक करून प्रतिसाद मिळवण्याचा प्रयत्न केला. प्रतिसाद न मिळाल्याने तिने खिडकीतून आत पाहिलं असता कविता रायपुरे या कॉटवर बेशुद्धावस्थेत दिसून आल्या. दरवाजा उघडल्यानंतर त्या मृत अवस्थेत आढळून आल्या. त्यांच्या डोक्यावर, छातीवर व चेहऱ्यावर तीव्र हत्याराने हल्ला केल्याचे स्पष्ट झाले.

        मृत महिला घरात एकट्याच होत्या. त्यांचा मुलगा सुरक्षा रक्षकाची नोकरी करत असून, तो कामानिमित्त रात्री 8 वाजता घराबाहेर गेला होता. या कुटुंबाचे कोणाशी वाद होते का, किंवा पैशासंबंधी कोणतीही देवाणघेवाण होती का, याचा तपास राजुरा पोलीस करीत आहेत. घटनास्थळी पोलीस दाखल होताच पंचनामा करून मृतदेह शवविच्छेदनासाठी पाठवण्यात आला. अज्ञात आरोपीविरुद्ध राजुरा पोलिसांनी भादंवि कलम 302 (ब) व 103 (1) नुसार गुन्हा दाखल केला आहे. या प्रकरणाचा तपास ठाणेदार सुमित परतीके यांच्या मार्गदर्शनाखाली सहाय्यक पोलीस निरीक्षक निशा भुते करीत असून आरोपीचा शोध सुरू आहे. कविता रायपुरे यांना दोन मुली व एक मुलगा असून, एक मुलगी राजुरात तर दुसरी मुलगी यवतमाळ येथे वास्तव्यास आहे.