मुल SDO सभागृहासाठी 1.30 कोटींचा निधी मंजूर

मुल SDO सभागृहासाठी 1.30 कोटींचा निधी मंजूर

आ. मुनगंटीवार यांच्या पाठपुराव्याला यश

आमचा विदर्भ - दीपक शर्मा 

चंद्रपूर (दि. 06 जून 2025) -

        राज्याचे माजी मंत्री आणि स्थानिक आमदार सुधीर मुनगंटीवार यांच्या सातत्यपूर्ण पाठपुराव्यामुळे मुल येथील SDO कार्यालयाच्या सभागृहाचे नूतनीकरण आता प्रत्यक्षात येणार आहे. या कामासाठी 1 कोटी 30 लाख रुपयांचा निधी मंजूर करण्यात आला असून लवकरच काम सुरु होणार आहे. मुल येथील नुकत्याच पार पडलेल्या आढावा बैठकीत सभागृहाच्या जीर्ण अवस्थेकडे लक्ष वेधून आ. मुनगंटीवार यांनी तातडीने नूतनीकरण करण्याचे निर्देश प्रशासनाला दिले होते. त्यानंतर प्रशासनाकडून निधीची मागणी करण्यात आली. आमदार मुनगंटीवार यांच्या पाठपुराव्यामुळे संबंधित प्रस्तावास प्रशासकीय मान्यता मिळाली आहे. या नूतनीकरणामुळे प्रशासनाच्या बैठकांपासून ते विविध कार्यक्रमांपर्यंत अनेक उपक्रम सुसंगत आणि कार्यक्षमतेने राबविता येणार आहेत. याचा थेट फायदा नागरिकांना होणार असून प्रशासकीय कामकाजाची गुणवत्ता व सुविधा यामध्ये लक्षणीय सुधारणा होणार आहे.

विकासाच्या मार्गावर मुल तालुका

        मुल तालुक्यातील विकासाची ही केवळ एक कडी असून याआधी देखील अनेक महत्वपूर्ण प्रकल्प आ. मुनगंटीवार यांच्या प्रयत्नातून साकारले गेले आहेत. यात मुख्य रस्ता, कर्मवीर मा.सा. कन्नमवार सभागृह, तहसील व पंचायत समितीच्या इमारती, नवीन पाणीपुरवठा योजना, स्टेडियम, इको पार्क, स्विमिंग टँक, आठवडी बाजार, आणि वाचनालय यांचा समावेश आहे. याशिवाय, 100 खाटांचे उपजिल्हा रुग्णालय मंजूर झाले असून त्याचे काम प्रगतीपथावर आहे. सोमनाथ येथे भव्य कृषी महाविद्यालय आणि मुलींसाठी शुरवी महाविद्यालय सुरु करण्यात आले आहे. आ. मुनगंटीवार यांच्या प्रयत्नांमुळे मुल तालुक्याचा चेहरामोहरा बदलला असल्याचे स्पष्टपणे दिसून येत आहे.