''राजुरातील लैंगिक शोषण प्रकरण'' आदिवासी विद्यार्थिनींच्या पालकांचा संघर्ष सुरूच

''राजुरातील लैंगिक शोषण प्रकरण''

आदिवासी विद्यार्थिनींच्या पालकांचा संघर्ष सुरूच

सहा वर्षांनंतरही आदिवासी विद्यार्थिनींना न्याय नाही; 16 मेपासून साखळी उपोषण

आमचा विदर्भ - ब्युरो रिपोर्ट्स

चंद्रपूर / राजुरा (दि. १३ मे २०२५) -

        राजुरा येथील इन्फंट जिजस कान्वेंट स्कूलच्या आदिवासी विद्यार्थिनींच्या वसतिगृहात घडलेल्या लैंगिक शोषण प्रकरणाला सहा वर्षे पूर्ण झाली आहेत. 7 नोव्हेंबर 2019 रोजी उघडकीस आलेल्या या प्रकरणात 18 विद्यार्थिनींवर लैंगिक शोषण झाल्याचे उघडकीस आले होते. या प्रकरणात पोलिसांनी पोक्सो कायद्याअंतर्गत गुन्हा दाखल केला असला तरी शाळेचे संचालक व काही आरोपी अजूनही मोकळेपणाने फिरत आहेत.

रमेश वेट्टी यांचा इशारा:

        पीडित विद्यार्थिनींच्या पालकांनी अन्यायाविरुद्ध आवाज उठवत 16 मेपासून जिल्हाधिकारी कार्यालयासमोर साखळी उपोषण करण्याचा इशारा दिला आहे. रमेश वेट्टी यांनी आयोजित पत्रकार परिषदेत सांगितले की, सहा वर्षे उलटूनही पीडित विद्यार्थिनींना न्याय मिळालेला नाही. सरकारच्या निर्णयानुसार आदिवासी मुला-मुलींची निवड प्रक्रिया नामांकित शाळांमध्ये घेतली जाते, मात्र या प्रक्रियेत ज्या विद्यार्थिनींना वसतिगृहात प्रवेश देण्यात आला, त्या विद्यार्थिनींवर अमानुष अत्याचार झाले.

गुंगीचे औषध आणि अत्याचार:

        वसतिगृहात या विद्यार्थिनींना गुंगीचे औषध देऊन लैंगिक शोषण करण्यात आले. घटनेनंतर विविध संघटनांनी निषेध मोर्चे काढले आणि पोलिसांनी पोक्सो कायद्याअंतर्गत गुन्हा दाखल केला. मात्र, आरोपींना जामीन मिळाला असून ते मोकळेपणाने फिरत आहेत.

प्रशासनाच्या दुर्लक्षामुळे संताप:

        वेट्टी यांनी आरोप केला की, प्रशासनाच्या दुर्लक्षामुळे पीडित विद्यार्थिनींना न्याय मिळालेला नाही. पालकांनी न्याय मिळेपर्यंत संघर्ष सुरू ठेवण्याचा निर्धार केला आहे. जर 16 मे रोजी सुरू होणाऱ्या साखळी उपोषणानंतरही प्रशासनाने दुर्लक्ष केले, तर आत्मदहन करण्याचा इशाराही पालकांनी दिला आहे. पत्रकार परिषदेत रमेश वेट्टी, दिवाकर गेडाम, ज्योत्सना कोडापे, शिला चित्रांगण, अस्मिता मडावी आणि पुजा आत्राम यांसह अनेक सामाजिक कार्यकर्ते उपस्थित होते.