बल्लारपूरमधील ऑटोमोबाइल्स दुकानात अडीच लाख रुपयांची चोरी

बल्लारपूरमधील ऑटोमोबाइल्स दुकानात अडीच लाख रुपयांची चोरी

आमचा विदर्भ - राजेश अरोरा, प्रतिनिधी

बल्लारपूर (दि. 08 मे 2025) -

        बल्लारपूर शहरातील बीटीएस चौकातील श्रीहरी ऑटोमोबाइल्स या दुकानाचे शटर उचकटून अज्ञात चोरांनी 2 लाख 50 हजार रुपये रोख लंपास केल्याची घटना 6 मे च्या मध्यरात्री घडली आहे. या घटनेने शहरात खळबळ उडाली आहे.

        बीटीएस चौक, गुरुनानक पब्लिक स्कूल समोर असलेल्या अवधेशकुमार शारदानंद शाह यांचे श्रीहरी ऑटोमोबाइल्स हे दुकान आहे. 5 मे रोजी रात्री 9 वाजता दुकान बंद करून शाह घरी गेले. मात्र 6 मे रोजी सकाळी 6 वाजता गुरुनानक पब्लिक स्कूलच्या प्रिन्सिपॉल लक्ष्मी यांनी शेजारील दुकानदार मनिष राखुंडे यांना फोन करून दुकानाचे शटर खुले दिसत असल्याचे कळवले.

       मनिष राखुंडे यांनी तात्काळ अवधेशकुमार शाह यांना माहिती दिली. शाह आपल्या दुकानात पोहचले असता शटर मधोमध उचललेले होते, तर बाजूच्या कुलूपांना हात लावलेला नव्हता. त्यांनी तातडीने पोलिसांना माहिती दिली. पोलिसांनी घटनास्थळी पोहोचून पाहणी केली असता, टेबलच्या ड्रॉवरचे लॉक तोडून त्यातील 2 लाख 50 हजार रुपये रोख रक्कम लंपास करण्यात आल्याचे निष्पन्न झाले. अवधेशकुमार शाह यांच्या तक्रारीवरून बल्लारपूर पोलीस ठाण्यात अज्ञात आरोपींविरुद्ध कलम 305, 334, (1) BNS अंतर्गत गुन्हा दाखल करण्यात आला आहे. पोलीस निरीक्षक श्याम गव्हाणे यांच्या मार्गदर्शनाखाली सहायक पोलीस निरीक्षक मदन दिवटे अधिक तपास करीत आहेत. बल्लारपूर शहरात यापूर्वीही शटर उचलून चोरीच्या घटना घडल्या आहेत. मात्र या घटनेतील चोरटे अद्याप पोलिसांच्या हाती लागले नाहीत. या घटनेने व्यापाऱ्यांमध्ये भीतीचे वातावरण निर्माण झाले आहे.