महसूल विभागाची अवैध रेती वाहतूक करणाऱ्यांवर मोठी कारवाई

महसूल विभागाची अवैध रेती वाहतूक करणाऱ्यांवर मोठी कारवाई

दोन गाड्या जप्त

आमचा विदर्भ - ब्युरो रिपोर्ट्स

भद्रावती (दि. 08 मे 2025) -

        भद्रावती तालुक्यातील बरांज गावाजवळ महसूल विभागाने अवैध रेती वाहतूक करणाऱ्या दोन पिकअप गाड्यांवर कारवाई केली आहे. या दोन्ही गाड्या महसूल विभागाच्या पथकाने जप्त करून तहसील कार्यालयात जमा केल्या आहेत. ग्राम महसूल अधिकारी राहुल भोंगळे हे एका शासकीय कार्यक्रमासाठी जात असताना बरांज गावाजवळ एम एच 34 एम 5916 व एम एच 34 ए व्ही 2074 या दोन गाड्यांमध्ये रेतीची अवैध वाहतूक होत असल्याचे त्यांच्या निदर्शनास आले. तातडीने त्यांनी गाड्यांची तपासणी केली असता, दोन्ही गाड्यांच्या चालकांकडे रेती वाहतुकीचा कोणताही परवाना आढळला नाही.

        महसूल विभागाच्या पथकाने तात्काळ या दोन्ही गाड्या जप्त करून तहसील कार्यालयात जमा केल्या. तहसीलदार राजेश भांडारकर यांच्या नेतृत्वात ग्राम महसूल अधिकारी राहुल भोंगळे, बंडू वेलफुलवार व निर्दोष फुलभोगे यांनी सदर कारवाई यशस्वीरीत्या पार पाडली. जप्त केलेल्या गाड्यांचा मालक अजय लिहितकर व प्रवीण नागपुरे असल्याचे समजते. तहसीलदार राजेश भांडारकर यांनी रेती तस्करीविरुद्ध तीव्र मोहिम हाती घेतली आहे. त्यामुळे रेती तस्करांमध्ये चांगलीच खळबळ उडाली आहे. या कारवाईमुळे महसूल विभागाची दक्षता व सक्रियता अधोरेखित झाली आहे.