कामगार दिनी रोजंदारी कामगारांचा गौरव!

कामगार दिनी रोजंदारी कामगारांचा गौरव!

आरपीआयने केला संघर्षशील श्रमिकांचा सन्मान

आमचा विदर्भ - दीपक शर्मा 

चंद्रपूर (दि. ०४ मे २०२५) -

        जागतिक कामगार दिनाचे औचित्य साधून रिपब्लिकन पार्टी ऑफ इंडियाच्या वतीने चंद्रपूरमध्ये प्रत्यक्ष काम करून जीवन जगणाऱ्या श्रमिकांचा सन्मान करण्यात आला. आरपीआयचे कार्यकर्ते अशोककुमार उमरे, अनैशा वाहन चालक कामगार संघटनेचे संस्थापक अध्यक्ष सुरज उपरे, ज्ञानेश्वर गोखरे व आकाश ताकसांडे यांच्या पुढाकाराने विविध क्षेत्रातील मेहनती कामगारांना शाल आणि पुष्पगुच्छ देऊन गौरवण्यात आले.

        सन्मानित करण्यात आलेल्या व्यक्तींमध्ये रोजंदारीवर काम करणाऱ्या शकूनबाई व बंडू पाटील, अंबुजा सिमेंट कंपनी चौकात स्वतःचा भेळपुरी स्टॉल चालवणारे कालीराम चिडे तसेच भाजीपाला विक्रीवर संपूर्ण कुटुंबाचा चरितार्थ चालवणाऱ्या रेष्माताई खोब्रागडे (हरदोना खुर्द) यांचा समावेश होता.

        या कार्यक्रमातून आरपीआय कार्यकर्त्यांनी श्रमाच्या सन्मानाला समाजात प्रतिष्ठा मिळावी, श्रमिकांचे योगदान ओळखले जावे, आणि रोजंदारीवर काम करणाऱ्यांनाही एक सामाजिक मान्यता मिळावी असा प्रेरणादायक संदेश दिला.