Shiv Jayanti राजुरा येथे विविध उपक्रमांसह शिव जयंती साजरी

Shiv Jayanti

राजुरा येथे विविध उपक्रमांसह शिव जयंती साजरी

भव्य दौड स्पर्धेचे आयोजन

आमचा विदर्भ - दीपक शर्मा

राजुरा (दि. २० मार्च २०२५) -

        शिवसेना राजुरा विधानसभा (उबाठा), भवानी दुर्गा उत्सव मंडळ राजुरा आणि ट्रक स्पोर्टींग क्लब राजुरा यांच्या संयुक्त विद्यमाने नाका नंबर 3 येथे छत्रपती शिवाजी महाराजांची जयंती उत्साहात साजरी करण्यात आली. यानिमित्त दौड स्पर्धेचे आयोजन करण्यात आले होते. या स्पर्धेला तरुणांचा उत्स्फूर्त प्रतिसाद लाभला, ज्यात सुमारे 400 युवक-युवतींनी सहभाग नोंदवला.

        स्पर्धेसाठी नाका नंबर 3 ते जुना बस स्टॅन्ड, ज्योतिबा महाविद्यालय, सोमनाथ वॉर्ड आणि पुन्हा नाका नंबर 3 असा मार्ग निश्चित करण्यात आला होता. शहराच्या विविध भागांतून ही दौड गेल्यामुळे नागरिकांचा मोठा प्रतिसाद मिळाला. स्पर्धेतील युवक-युवती गटातील प्रत्येकी पाच विजेत्यांना रोख रक्कम व सन्मानचिन्ह देऊन गौरवण्यात आले.

        दौड स्पर्धेनंतर छत्रपती शिवाजी महाराजांच्या स्मृतीस्थळाचे पूजन करण्यात आले. त्यानंतर आयोजित महाप्रसादाच्या कार्यक्रमाचा हजारो नागरिकांनी लाभ घेतला. या कार्यक्रमाला गोवरी गावच्या सरपंच आशा बबन उरकुडे, वैद्यकीय अधिकारी डॉ. अशोक जाधव आणि मुख्य आयोजक बबन उरकुडे यांच्या प्रमुख उपस्थितीत पार पडला. यावेळी शैलेश महाराज कावळे यांनी छत्रपती शिवाजी महाराजांच्या जीवनशैलीविषयी मार्गदर्शन केले.

        कार्यक्रमाच्या सुरक्षिततेसाठी शहरातील पोलीस प्रशासनाने ठिकठिकाणी बंदोबस्त ठेवण्यात आला होता. कार्यक्रमाच्या यशस्वितेकरिता शिवसेना पदाधिकारी, छत्रपती मॉर्निंग ग्रुपचे सत्यपाल गेडाम, विनोद साळवे, शंकर पारखी, रमेश अस्वले, सुदर्शन इद्दे, सुबोध डाहुले, रुपेश बोर्डे, गणेश मुसळे, सुनील धानोरकर, वाभितकर सर, चेतन इटणकर, नागेश हेपट तसेच ट्रक स्टार स्पोर्टींग क्लबचे मार्गदर्शक नागेश जाधव व त्यांच्या विद्यार्थ्यांनी परिश्रम घेतले.