प्रसिद्ध व्यापारी रमेश झंवर यांचेवर दुसऱ्यांदा हल्ला

लुटीसाठी हल्ल्याचा संशय - सुदैवाने बचावले

आमचा विदर्भ - अनंता गोखरे कार्यालय प्रतिनिधी

राजुरा (दि. १ जानेवारी २०२३) -

      राजुरा येथील राजीव गांधी चौक येथील रहिवाशी व प्रसिद्ध व्यापारी रमेश हनुमान प्रसाद झंवर, वय 45 यांचेवर त्यांच्या आर्वी येथील कॉटन मिल येथून राजुरा शहराकडे येताना रात्री नऊ वाजण्याच्या सुमारास अज्ञात मोटर सायकल स्वारांनी डोक्यावर लाठी मारून हल्ला केला. मात्र सुदैवाने रमेश यांनी स्वतःला सावरून पोलिस ठाण्यात पर्यंत पोहोचले आणि राजुरा पोलिस ठाण्यात तक्रार दाखल केली. जानेवारी 22 मध्ये त्यांचेवर याच भागात हल्ला झाला होता, मात्र त्यावेळीही ते सुदैवाने बचावले होते. हल्लेखोरांनी लूट करण्यासाठी त्यांचेवर हल्ला केला असावा, असा संशय व्यक्त करण्यात येत आहे. या घटनेमुळे येथे व्यापारी वर्गात दहशतीचे वातावरण निर्माण झाले आहे. 

        रमेश झंवर यांचे आर्वी येथे कॉटन मिल आहे. येथील कामकाज आटोपून दररोज रात्री ते राजुरा येथे येतात. दिनांक 28 डिसेंबर ला रात्री नऊ वाजता नेहमी प्रमाणे ते दुचाकीने राजुरा कडे निघाले. यावेळी एका मोटरसायकल वर स्वार दोन इसमांनी मागून येऊन एका लाठीने डोक्यावर जोरदार प्रहार केला. मात्र सुदैवाने तो वार थोडा बाजूला बसला तरी यामुळे रमेश यांच्या डोक्याला जखम होऊन रक्ताची धार लागली. मात्र त्याही अवस्थेत ते गाडीने राजुरा पर्यंत आले आणि दवाखान्यात दाखल झाले. यानंतर रात्री राजुरा पोलिस ठाण्यात तक्रार नोंदविली. रमेश झंवर हे व्यावसायिक असल्याने  रक्कम घेऊन जात असावेत, या संशयातून रात्री त्यांचेवर हल्ला करून लूट करण्याचा इराद्या असावा, असा संशय व्यक्त करण्यात येत आहे. या प्रकरणी राजुरा पोलिसांनी अज्ञात इसमांविरुद्ध गुन्हा नोंदविला असून राजुरा पोलिस अधिक तपास करीत आहेत.