राजूराच्या युवकाची चंद्रपुरात हत्या प्रकरण आरोपींचा सात दिवसांचा पीसीआर

राजूराच्या युवकाची चंद्रपुरात हत्या प्रकरण

आरोपींचा सात दिवसांचा पीसीआर

डी. एस. ख्वाजा - आमचा विदर्भ प्रतिनिधी

चंद्रपूर -

राजुऱ्यातील एका युवकाची राजुऱ्यातीलच आरोपीने मित्राच्या सहकार्याने चंद्रपुरातील ज्युबिली हायस्कूल परिसरातील शिक्षण भवन येथे हत्या केल्याची घटना घडली होती. याप्रकरणात तीन आरोपींना अटक करण्यात आली आहे. दरम्यान, तिन्ही आरोपींना न्यायालयात हजर केले असता सहा दिवसांची पोलीस कोठडी सुनावण्यात आली. घटनेचा तपास शहर पोलीस ठाण्याचे एपीआय अतुल स्थूल करीत आहे.

राहुल ठक या युवकाच्या हत्येप्रकरणात वैभव डोंगरे रा. राजुरा, संदीप उर्फ गुड्ड राजकुमार बर्लेवार रा. इंदिरानगर चंद्रपूर आणि कार्तिक रमेश बावणे रा. आंबेडकर चौक सिंदेवाही या तिघांना अटक करण्यात आली. वैभव डोंगरे घटनेचा मुख्य सूत्रधार आहे. मृतकाने आरोपीच्या आईच्या भ्रमणध्वनीवर वर्षभरापूर्वी आक्षेपार्ह संदेश पाठविला होता. त्यावेळी मृतक राहुल ठक याला मारहाणही करण्यात आली होती. परंतु, यानंतरही आरोपीचा मृतकावर राग होता. वैभव हा राहुलचा काटा काढण्याच्या प्रयत्नात होता. नाशिक येथे काम करीत असलेला राहुल काही दिवसांपूर्वी स्वगावी राजुरा येथे आला होता. यानंतर त्याने मित्रांना सोबत घेत राहुलला संपविण्याचा कट रचला. त्या तिघांनीही राहुलला बोलावून घेतले, शिक्षक भवनाच्या निर्जन इमारतीवर मृतकाला दारू पाजली. यानंतर तिघानीही त्याचे हातपाय चिकटपट्टीने चिकटवून त्याच्या डोक्यावर दारूच्या बॉटल्स फोडल्या. घटनेनंतर पळून जाण्याच्या प्रयत्नात असताना एकाला चंद्रपुरातून तर दोघांना नागपूर रेल्वेस्थानकावरून अटक करण्यात आली. तिन्ही आरोपींना न्यायालयात हजर केले असता सहा दिवसांची पोलीस कोठडी सुनावण्यात आली. या प्रकरणात आरोपी तिघेच होते की आणखी कोणाचा सहभाग होता याचा तपास पोलीस करीत आहे. घटनेचा पुढील तपास पोलीस निरीक्षक सुधाकर अंभोरे यांच्या मार्गदर्शनात एपीआय स्थूल, सुरेंद्र खनके, दर्शना फुलझेले, बालाजी कवलवार यांचे पथक करीत आहे.