अखेर मनपाच्या लेबर पेमेंट घोटाळ्याची चौकशी सुरू

• अखेर मनपाच्या लेबर पेमेंट घोटाळ्याची चौकशी सुरू
• ॲडव्हान्स कपात तातडीने बंद करण्याचे निर्देश
• शेकडो कामगारांना दिलासा मिळणार

डी. एस. ख्वाजा - आमचा विदर्भ प्रतिनिधी

चंद्रपूर -

शहर महानगरपालिकेच्या सर्वच विभागातील कंत्राटी कामगारांच्या खात्यातून ॲडव्हान्सच्या नावाखाली दरमहा हजारो रुपयांची कपात करून लेबर पेमेंट घोटाळा होत असल्याचा प्रकार जनविकास सेनेचे अध्यक्ष पप्पू देशमुख यांनी उघडकीस आणला होता. त्यासंदर्भातील पुरावे स्थायी समितीमध्ये सादर केले होते. तसेच याबाबतची तक्रार देशमुख यांनी जिल्हाधिकारी तसेच उद्योग, उर्जा व कामगार विभागाचे सहाय्यक आयुक्त यांच्याकडे केली होती. त्याची दखल घेत या घोटाळ्याची चौकशी उद्योग ऊर्जा व कामगार विभागाच्या सहाय्यक आयुक्तांनी सुरू केली आहे.

सोमवारी या प्रकरणाची पहिली सुनावणी सहाय्यक कामगार आयुक्त श्रीमती जा.मा. भोईटे यांच्या दालनात घेण्यात आली. यावेळी कामगार विभागाचे एस.डब्लू.पारधी, महानगरपालिकेतर्फे आरोग्य विभागाचे प्रमुख डॉ. अमोल शेळके, संतोष गर्गेलवार, कनिष्ठ अभियंता अमित फुलझेले, सोनू थूल, कंत्राटदार विरेंद्र सिंह उपस्थित होते. प्रत्येक महिन्याला शेकडो कामगारांच्या खात्यातून ॲडव्हान्सच्या नावाखाली विशिष्ट रक्कम कपात करणे चुकीचे असल्याने ही कपात तातडीने बंद करण्यात यावी, असे निर्देश साहाय्यक कामगार आयुक्त यांनी मनपाच्या प्रतिनिधींना दिले. सोबतच सर्वच विभागातील कंत्राटी कामगारांच्या वेतनाबाबत व त्यांनी घेतलेल्या ऍडव्हान्स बाबत अहवाल देण्याचे निर्देश  मनपाला दिले. या प्रकरणाची पुढील सुनावणी 8 जून रोजी घेण्यात येणार आहे. मात्र ॲडव्हान्सची कपात बंद होणार असल्याने महानगरपालिकेतील शेकडो कंत्राटी कामगारांना तातडीने दिलासा मिळणार आहे. 

ॲडव्हान्सच्या नावाखाली दर महिन्याला पगारातून कपात करणारे कंत्राटदार व यासाठी दोषी अधिकारी यांच्याविरूद्ध फौजदारी कारवाई करण्याची मागणी देशमुख यांनी सहाय्यक कामगार आयुक्त यांच्याकडे केलेली आहे. त्यामुळे आता कोणती कारवाई होते याकडे सर्वांचे लक्ष लागले आहे.