पोलीस उपविभागीय कार्यालयातील रायटर व चालक यांना लाच घेतांना अटक

• पोलीस उपविभागीय कार्यालयातील रायटर व चालक यांना लाच घेतांना अटक
• दारू व्यावसायिकाच्या तक्रारीवर एसीबीची कारवाई
• वाचा सविस्तर.....

आमचा विदर्भ - ब्युरो रिपोर्ट्स

राजुरा -

येथील उपविभागीय कार्यालयातील उपविभागीय पोलिस अधिकारी यांचे रायटर व गाडी चालक या दोन पोलीस कर्मचाऱ्यांना सुमारे 50 हजाराची लाच घेतांना 29 एप्रिलला दुपारी 3 वाजताच्या दरम्यान रंगेहात पकडण्यात आले. विशेष म्हणजे लाच घेतलेल्या एका आरोपीच्या दुचाकी मधुन सुमारे 2 लाख 60 हजार रुपयांची रक्कम मिळाली यामुळे या प्रकरणाने गंभीर वळण घेतले आहे. राजुरा पोलीस ठाण्यात रात्री उशिरापर्यंत गुन्हा दाखल करण्याची कारवाई सुरू आहे.

एका दारू व्यावसायिकाला उपविभागीय पोलिस अधिकारी कार्यालयातील दोन पोलिसांनी 50 हजाराची लाच मागितली होती. याविषयी तक्रार मिळताच नागपुर येथील लाच लुचपत प्रतिबंधक विभागाने सापळा रचला. उपविभागीय कार्यालया बाहेर असलेल्या चहाच्या टपरी वर 50 हजारांची लाच घेतांना रंगेहाथ पकडले. यानंतर त्यांच्या दुचाकीची तपासणी केली असता त्यात 2 लाख 60 हजार रुपयांची रक्कम मिळाली. आरोपी राजेश त्रिकोलवार वय 52 वर्षे, व सुधांशू मडावी वय 40 वर्षे असे रंगेहाथ अटक झालेल्यांची नवे आहेत. राजेश हे डीवायएसपी चे रायटर असून सुधांशू हा गाडी चालक आहे.

या दोन्ही पोलिसांकडे एवढी मोठी रक्कम सापडल्याने खळबळ उडाली आहे. एवढ्या मोठ्या प्रमाणात रक्कम मिळाल्याने अनेक प्रश्न निर्माण होत आहे. यात अधिकाऱ्यांची काय भूमिका आहे? याची चौकशी करण्याची गरज आहे? असे नागरिकांचे म्हणणे आहे. विशेष म्हणजे मिळालेल्या माहितीनुसार दुचाकित सापडलेल्या रक्कमे सोबत ज्यांच्या कडून रक्कम वसूल केली आहे आणि अजून रक्कम गोळा करायची आहे? या प्रकरणामध्ये आणखी कोण सहभागी आहे? 

मिळालेल्या माहितीनुसार बल्लारपुर येथील बारमालक पण सध्या नागपुरात वास्तव्यात असलेले पवन विजय जयस्वाल वय 38 वर्ष यांच्या आई शोभा जयस्वाल यांच्या नावाने असलेल्या नागपूर येथील अशोका बार मधून दिनांक 16 मार्च 2021 रोजी पहाटे 3.00 वाजता पवन चा चुलत भाउ परमानंद जयस्वाल यांचे मालकीचे चारचाकी वाहन क्र. एम.एच. 31 सीपी 8464 मध्ये चालक नामे अक्षय बुरांडे हा बुटीबोरी येथील माझे बार मधुन 40 पेटी देशी दारु बुटीबोरी येथुन राजुरा येथे घेवुन जात असता बल्लारपुर पोलीस स्टेशनचे हद्दीमध्ये पोलीस शिपाई सुधांशु मडावी यांनी त्यांचे वाहन अडवुन वाहनाची तपासणी केली. मडावी ला वाहनात विनापरवाना देशी दारुच्या एकुण 40 पेट्या मिळुन आल्या. दारुचे विनापरवाना वाहतुक करीत असल्याचे सांगुन, पोलीस स्टेशन बल्लारपुर येथे चालक अक्षय बुरांडे यांचे विरुध्द अपराध क्र. 300/2022 कलम 65(अ), 83महाराष्ट्र दारुबंदी अधिनियम नुसार गुन्हा नोंद करुन वाहनातील अवैद्य दारूसाठा व वाहन पोलीस स्टेशन बल्लारपुर येथे जमा करण्यात आला व वाहन चालक यास नमुद गुन्हयात अटक करुन सुचनापत्र देवुन सोडले. त्यानंतर पोलीस शिपाई सुधांशु मडावी यांनी जयस्वाल यांचे मोबाईल क्रमांका वर फोन तसेच मसेज करुन सदर गुन्हयाची माहीती देवुन गुन्हयात त्यांना आरोपी न करण्याकरीता रुपये 50 हजाराची मागणी केली. जयस्वाल यांची लाच देण्याची इच्छा नव्हती याची तक्रार त्यांनी लाच लुचपत प्रतिबंधक विभागाच्या उपपोलीस अधीक्षक श्रीमती योगिता चाफले यांचेकडे केली आणि लाच लुचपत प्रतिबंधक विभागाच्या पोलिसांनी सापळा रचत या दोघांना अटक केली. सदर कारवाई लाच लुचपत प्रतिबंधक विभागाच्या उपपोलीस अधीक्षक श्रीमती योगिता चाफले यांच्या नेतृत्वात वर्ष मत्ते, नपोशी अनिल बाहरे, अमोल मेघरे, विकास गडपायले आदींनी केली. पोलिसांनी आरोपीविरुद्ध भ्रष्ट्राचार प्रतिबंधक अधिनियम १९८८ कलम ७ अन्वये गुन्हा दाखल केला. असून समोरील तपास नागपुर येथील लाच लुचपत प्रतिबंधक विभागाच्या उपपोलीस अधीक्षक श्रीमती योगिता चाफले आणि त्यांचे कर्मचारी करीत आहेत.