19 उमेदवारांची माघार; नपं निडणुकीच्या रणधुमाळीला सुरूवात

• चंद्रपूर जिल्ह्यातील सावली, गोंडपिपरी, पोंभुर्णा, कोरपना, सिंदेवाही नगर पंचायत निवडणूक
• 19 उमेदवारांची माघार; नपं निडणुकीच्या रणधुमाळीला सुरूवात

शशी ठक्कर - आमचा विदर्भ प्रतिनिधी

चंद्रपूर -

चंद्रपूर जिल्ह्यातील सावली, गोंडपिपरी, पोंभुर्णा, कोरपना, सिंदेवाही या नगरपंचायतीसाठी निवडणूक 21 डिसेंबरला होणार आहे. सर्वोच्च न्यायालयाने ओबीसी आरक्षणाला स्थगिती दिल्यामुळे ओबीसी प्रवर्गातील अर्जाचा यामध्ये विचार करण्यात आला नाही. दरम्यान सोमवारी अर्ज मागे घेण्याची अंतिम तारीख असल्याने एकूण 19 जणांनी आपला उमेदवारी अर्ज मागे घेतला. त्यामुळे निवडणूक रिंगणातील चित्र स्पष्ट झाले असून नगरपंचायत निवडणुकीच्या रणधुमाळीला सुरुवात झाली आहे.

सिंदेवाहीत 7 जणांची माघार तर, 66 उमेदवार रिंगणात

सिंदेवाही-लोनवाही नगरपंचायत मधील सार्वत्रिक निवडणकीत 73 उमेदवारांनी नामांकन दाखल केले होते. उमेदवारी मागे घेण्याच्या शेवटच्या दिवशी सात उमेदवारांनी आपला उमेदवारी अर्ज मागे घेतल्याने आता 14 प्रभागासाठी एकूण 66 उमेदवार रिंगणात आहेत. सिंदेवाही-लोणवाही या नगरपंचायत मध्ये एकूण 17 प्रभाग आहेत. ओबीसी आरक्षण निर्णय स्थगित असल्याने ओबीसी प्रवर्गासाठी राखीव असलेले प्रभाग क्रमांक 9, 10, 17 या तीन प्रभागातील निवडणूक स्थगित करण्यात आली. त्यामुळे केवळ 14 प्रभागात मतदान होणार आहे. दरम्यान आज सात उमेदवारांनी आपले उमेदवारी अर्ज मागे घेतले आहे. त्यामुळे आता एकूण 66 उमेदवार रिंगणात असल्याने निवडणूक चांगलीच रंगतदार होणार असल्याचे चित्र दिसून येत आहे. 

कोरपन्यात सात उमेदवारांची माघार

कोरपना नगरपंचायतची दुसरी सार्वत्रिक निवडणुकीकरिता 14 प्रभागासाठी 35 उमेदवारांनी अर्ज दाखल केले होते. यातील सात उमेदवारांनी सोमवारी अर्ज मागे घेतले. यामुळे आता काँग्रेस विरुद्ध युतीत थेट सामना रंगणार आहे. 17 सदस्य असलेल्या कोरपना नगरपंचायतमध्ये प्रभाग क्रमांक एक.दोन. सतरा येथील निवडणूक सुप्रीम कोर्टाच्या आदेशाने ओबीसी आरक्षण वरून स्थगित करण्यात आली. आता चौदा ही प्रभागात काँग्रेसव भाजपा, शेतकरी संघटना, राष्ट्रवादी काँग्रेस, शिवसेना युतीमध्ये थेट लढत बघायला मिळणार आहे.

सावलीत 45 उमेदवार रिंगणात

नगरपंचायतच्या निवडणुकीसाठी 14 प्रभागासाठी 63 जणांनी नामांकन अर्ज दाखल केले होते. अर्ज छाननीमध्ये 16 अर्ज बाद करण्यात आले होते. तर सोमवारी प्रभाग क्रमांक 15 व 16 मधील एकाच उमदेवाराने अर्ज मागे घेतल्याने 45 उमेदवार रिंगणात उभे आहेत. 

तीन प्रभागातील निवडणूक रद्द

सर्वोच्च न्यायालयाने ओबीसीचे आरक्षण स्थगित केल्याने ओबीसी आरक्षण राखीव असलेल्या प्रभाग क्रमांक तीन, चार व दहा येथील निवडणूक रद्द करण्यात आली. त्यामुळे या प्रभागातील इच्छूकांचा हिरमोड झाला. अनेकांनी राष्ट्रीय पक्षाकडे आपली दावेदारी सिद्द करण्यासाठी केलेले प्रयत्न तूर्तास व्यर्थ गेले आहेत.

आता फुटणार प्रचाराचा नारळ

निवडणुकीचा कार्यक्रम जाहीर होताच इच्छूक उमेदवारांनी तयारी सुरू केली होती. सोमवारी दोन जणांनी अर्ज मागे घेतल्याने 45 उमेदवार रणांगणात आहेत. मंगळवारला चिन्ह वाटप होणार आहे. त्यानंतर खरा प्रचाराचा नारळ फुटणार आहे.

तीन उमेदवारी अर्ज मागे

गोंडपिपरी नपच्या निवडणुकीसाठी एकूण 78 उमेदवारांनी नामांकन दाखल केले होते. त्यापैकी सहा अर्ज बाद करण्यात आले. दरम्यान 13 डिसेंबरला एकूण तीन उमेदवारांनी अर्ज मागे घेतले असून उर्वरीत 69 उमेदवार निवडणूक रिंगणात आहेत. त्यामुळे निवडणूक रिंगणातील चित्र स्पष्ट झाले आहे.

13 प्रभागातील 61 उमेदवार रिंगणात

पोंभूर्णा नगरपंचायत निवडणूकीसाठी 13 प्रभागातील एकूण 61 उमेदवारांनी नामांकन अर्ज दाखल केले होते. त्यापैकी सोमवारी कुणीही नामांकन अर्ज वापस घेतलेले नाही. आजमितीस पोंभूर्णा नगरपंचायतच्या निवडणुकीसाठी एकूण 61 उमेदवार रिंगणात आहेत.