मोहाळी येथील घटनास्थळी अंनिसची भेट

• पिडितांचे सांत्वन आणि उपस्थितांचे समुपदेशन

शशी ठक्कर - आमचा विदर्भ प्रतिनिधी

चंद्रपूर -

चंद्रपूर जिल्ह्य़ातील नागभीड तालुक्यातील मोहाळी येथे जादूटोणा करण्याच्या संशयावरून दिलीप वाघ यांना मारहाण करण्यात आली. गावातील शेजारी राहणाऱ्या विकास विनायक गजबे याने जादूटोणा करून माझ्या भावाला आजारी केले असा आरोप करून पीडिताला घरात जाऊन मारहाण केली. पोलिसांनी या प्रकरणाची तातडीने दाखल घेऊन, आरोपीला अटक करून जादूटोणा विरोधी कायदयांतर्गत गुन्हा दाखल केला आहें. या प्रकरणाचा पुढील तपास पोलीस निरीक्षक प्रमोद मडामे करीत आहेत. या घटनेमागील वास्तविकता जाणून घेण्यासाठी, पीडित व्यक्ती आणि कुटुंबियांचे सांत्वन करण्यासाठी, त्यांचे समुपदेशन करण्यासाठी अखिल भारतीय अंधश्रद्धा निर्मूलन समिती, शाखा ब्रम्हपुरीच्या वतीने ॲड. गोविंद भेंडारकर, जिल्हाध्यक्ष अ.भा. अंनिस चंद्रपूर यांच्या नेतृत्वात प्रा. बालाजी दमकोंडवार तालुका संघटक ब्रम्हपुरी, सुजित खोजरे, सदस्य अ.भा. अंनिस चंद्रपूर  यांनी भेट दिली. यावेळी आरोपीचे कुटुंबीय आणि उपस्थित गावाकऱ्यांचेही समुपदेशन करण्यात आले, अशा घटना पुन्हा घडू नयेत यासाठी जादूटोना विरोधी कायद्याची माहिती देण्यात आली, तसेच या प्रकरणात कुणी मांत्रिक किंवा इतर व्यक्ती सहभागी असल्यास त्याबाबतीत माहिती देऊन पोलिसांना सहकार्य करण्याबाबत चर्चा करण्यात आली. नागभीड पोलीसांकडून या प्रकरणी सविस्तर माहिती घेण्यात आली. उपस्थितांचे समुपदेशन, पिडीतांना भेट देत चर्चा करत अ.भा.अंनिस ने दिलेला आधार महत्त्वपूर्ण ठरला आहे.