नांदाफाटा औद्योगिक परिसरात २३ दिवसापासुन कोविड लसीचा पुरवठा बंद

• लस न मिळाल्यास आंदोलन छेडणार - शिवचंद्र काळे

धनराजसिंह शेखावत - आमचा विदर्भ प्रतिनिधी

गडचांदूर -

नांदाफाटा औद्योगिक परिसरात मागील २३ दिवसांपासून कोविड लस उपलब्ध नसल्याने येथील लसीकरण केंद्र ओसाड पडले आहे. येथील नागरिकांची लसीकरणा करिता वणवण भटकंती सुरू असून तालुक्यातील अनेक ठिकाणच्या लसीकरण केंद्रावर लसीकरणा करिता नागरिक पुढाकार घेत नसल्याचे चित्र आहे. 

नांदाफाटा हा परिसर औद्योगिक असल्याने येथील लोकसंख्या १५ हजाराच्या वर आहेत आरोग्य विभागाकडून नांदाफाटा येथील लसीकरण केंद्राला आत्तापर्यंत १३५० लसीचे डोस पुरवल्याची माहिती आहे, जे की लोकसंख्येच्या १० टक्केही नाही. प्रशासनाच्या ढिसाळ नियोजनामुळे नांदाफाटा येथील लसीकरण केंद्रावर २३ दिवसांपासून लसच उपलब्ध झाली नाही. ८४ दिवसांपेक्षा जास्त दिवस झालेल्या अनेक नागरिकांना दुसऱ्या डोज करिता वणवण फिरावे लागत असून इतर लसीकरण केंद्रावर ताटकळत उभे राहावे लागत आहे. अनेक नागरिकांनी पहिला डोस घेतल्याला १०० दिवस होऊनही त्यांना अद्याप दुसरा डोस मिळाला नसल्याने त्यांची चिंता वाढली आहे. प्रशासनाकडून तिसऱ्या लाटेचा संसर्ग होण्याची भीती व्यक्त केली जात असून नागरिकांनी जास्तीत जास्त लसीकरण करावे असे वारंवार सांगितले जात आहे मात्र २३ दिवसापासुन लसीचा ठणठणाट आहे. येथील नागरिकांची लसीकरणाकरिता वणवण भटकंती सुरू असल्याने मनस्तापही सहन करावा लागत आहे लसीकरण केंद्रावर तातडीने लस उपलब्ध करून देण्याची मागणी नागरिकांनी केली असून लवकर लास उपलब्ध करून नि दिल्यास येथील नागरिकांनी आंदोलनाचा इशारा दिला आहे.

आरोग्य अधिकार्‍यांना वारंवार नांदाफाटा येथील लोकसंख्येचा विचार करून नियमित लस उपलब्ध करून देण्याची विनंती करीत आहे. शासनाच्या कार्यप्रणालीनुसार आम्ही लसीकरणाचा कार्यक्रमाचे नियोजन करतो असे अधिकारी सांगत आहे. पहिल्या डोजला १०० दिवस उलटूनही अद्याप पावतो अनेक नागरिकांना दुसरा डोस उपलब्ध झाला नसल्याने नागरिकांमध्ये चिंता व्यक्त केली जात आहे. औद्योगिक परिसर व लोकसंख्येचा विचार करून तातडीने नांदाफाटा लसीकरण केंद्रावर लस उपलब्ध करून द्यावी अन्यथा नागरिकांना घेऊन आंदोलन छेडण्याचा इशारा देण्यात आला आहे.

शिवचंद काळे

जिल्हा परिषद सदस्य