’कर्नाटका'ची 'नंदिनी' आता विदर्भात !

• गडचांदूरच्या 'स्वप्नपूर्ती'शी 20 हजार लिटर दुधाचा करार 

धनराजसिंह शेखावत - आमचा विदर्भ प्रतिनिधी

गडचांदूर -

कोरपना तालुक्याचा लौकिक दुग्ध उत्पादनात निर्माण करण्याचा पहिला जोरकस प्रयत्न गडचांदूरच्या दोन तरुण उद्योजकानी केला. बाखर्डी येथे 'स्वप्नपूर्ती फूड प्रा. लि. कंपनी' सुरू केली. या कंपनीचे संचालक निलेश ताजने आणि अभियंता संतोष मोतेवाड यांनी ही कंपनी नावारूपास आणली. आपले दुग्ध उत्पादन अनेक जिल्ह्यात यशस्वीरित्या पोहचविले. त्यांच्या अथक परिश्रमामुळे कंपनीला आणखी मोठी संधी चालून आली आहे. 

'कर्नाटका मिल्क फेडरेशन' या भारतातील दुसऱ्या नंबरच्या कंपनीने स्वप्नपूर्ती फूड प्रा. लि. कंपनी' सोबत व्यावसायिक करार केला आहे. कर्नाटका मिल्क फेडरेशनच्या 'नंदिनी' या ब्रँडचे दर महिन्याला 20 हजार लिटर दुग्ध उत्पादन करून देणार आहे. या नंदिनी ब्रँडचे विदर्भात लॉन्चिंग झाले आहे. हा कार्यक्रम नागपूर येथील रेडिसन ब्लु या पंचतारांकित हॉटेल मध्ये नुकताच झाला. त्या कार्यक्रमासाठी महाराष्ट्राचे माजी मुख्यमंत्री देवेंद्र फडणवीस, कर्नाटक सरकारमधील मंत्री तसेच कंपनीचे अधिकारी यांच्यासह 'स्वप्नपूर्ती फूड प्रा. लि. कंपनी'चे संचालक गडचांदूरचे निलेश ताजने आणि जिवतीचे इंजि. संतोष निवृत्ती मोतेवाड उपस्थित होते. कोरपना तालुक्यातील दुग्ध उत्पादनाला झळाळी मिळण्याची संधी या उद्योजकांमुळे प्राप्त झाली असून त्यांचे सर्वत्र अभिनंदन केले जात आहे.