येणाऱ्यांना अनिवार्य, जाणाऱ्यांना सवलत

• करोना चाचणीच्या नियमाची प्रवाशांमध्ये चर्चा

आयशा - आमचा विदर्भ प्रतिनिधी
नागपूर -
नागपूर येथील डॉ. बाबासाहेब आंबेडकर आंतरराष्ट्रीय विमानतळावरून बाहेरगावी प्रवास करणाऱ्यांना आरटीपीसीआर चाचणीचा निगेटिव्ह अहवाल बाळगणे बंधनकारक करण्यात आलेले नाही. मात्र, बाहेरून येणाऱ्या प्रत्येक प्रवाशाला हा अहवाल अनिवार्य करण्यात आला आहे. येणाऱ्यांना अहवालाची सक्ती आणि जाणाऱ्यांना सवलत अशा स्वरूपाच्या या नियमाची प्रवाशांमध्ये चर्चा रंगली आहे.

करोनाचे घटलेले संक्रमण लक्षात घेत राज्य सरकारने काही शहरांतील निर्बंध शिथिल केले आहेत. त्या अंतर्गत नागपुरातही बऱ्याच प्रमाणात निर्बंध हटविण्यात आले आहेत. जिथे संक्रमणाचा प्रसार मोठ्या प्रमाणात आणि झपाट्याने होण्याची शक्यता आहे, तिथे अद्याप मर्यादा कायम ठेवल्या आहेत. अशातच विमानतळ प्रशासनाने नागपूरहून इतर शहरांत जाणाऱ्या प्रवाशांना आरटीपीसीआर चाचणीचा निगेटिव्ह अहवाल बंधनकारक केलेला नाही. परंतु, इतर शहरातून नागपुरात येणाऱ्या प्रवाशांसाठी निगेटिव्ह अहवाल सोबत असणे आवश्यक आहे. बाहेरील संक्रमित व्यक्तीचा शहरात प्रवेश होऊ नये, या दृष्टीने प्रशासनातर्फे खबरदारी घेण्यात येत आहे. नागपूरकरांच्या सुरक्षेच्या दृष्टीने ही चांगली बाब असली तरी शहरातून कुणी संक्रमित व्यक्ती बाहेर जाण्याची शक्यता बळावली आहे. नागपुरातून बाहेर जाणाऱ्यांना निगेटिव्ह अहवालाची सक्ती नसल्याने त्याच्या माध्यमातून इतर शहरात संक्रमणाचा फैलाव होऊ शकतो. तसेच बाहेर गेलेल्या व्यक्तीचा शहरात परत येण्यापूर्वी चाचणी अहवाल पॉझिटिव्ह आल्यास त्याला पुढील किमान चौदा ते सतरा दिवस प्रवेश मिळणार नसल्याने चिंता वाढली आहे. या प्रकारच्या नियमामुळे विमान प्रवासदेखील घटल्याचे दिसून येत आहे.

अहवाल असावा बंधनकारक
नागपूर विमानळावरून ये-जा करणाऱ्या प्रत्येक प्रवाशासाठी आरटीपीसीआर चाचणीचा निगेटिव्ह अहवाल बंधनकारक असायला हवा. त्याशिवाय आरोग्यसेतू अॅपमध्ये हेल्थ स्टेटस पाहूनच प्रवाशांना पुढील प्रवास करू देण्याची मागणी होऊ लागली आहे.