अन्य युवकासोबत साक्षगंध केल्याने संतप्त प्रियकराने प्रेयसी असलेल्या वागदत्त वधूचे छायाचित्र केले व्हायरल

• प्रियकराविरुद्ध विनयभंगासह विविध कलामन्वये गुन्हा दाखल

आयशा - आमचा विदर्भ कार्यालय प्रतिनिधी

नागपूर -

अन्य युवकासोबत साक्षगंध केल्याने संतप्त प्रियकराने प्रेयसी असलेल्या वागदत्त वधूचे छायाचित्र व्हायरल केले. ही घटना नंदनवन भागात घडली. याप्रकरणी नंदनवन पोलिसांनी प्रियकराविरुद्ध विनयभंगासह विविध कलामन्वये गुन्हा दाखल केला. नितीन इंगळे वय ३२, रा. नंदनवन, असे गुन्हा दाखल करण्यात आलेल्या प्रियकराचे नाव आहे. २८ वर्षीय तरुणीच्या तक्रारीवरून हा गुन्हा दाखल करण्यात आला. गत चार वर्षांपासून इंगळे याचे तरुणीसोबत प्रेमसंबंध होते. तरुणीच्या नातेवाइकांनी त्याला विरोध केला. एका युवकासोबत तिचे साक्षगंध केले. याबाबत नितीन याला कळताच त्याने तरुणीचे छायाचित्र व्हायरल केले. तरुणीला लग्न न करण्याची धमकी दिली.

एकतर्फी प्रेमातून विवाहितेच्या पतीला मारहाण

नागपूर - एकतर्फी प्रेमातून ४० वर्षीय इसमाने २६ वर्षीय विवाहितेच्या पतीला मारहाण केली. ही घटना लकडगंज भागात शुक्रवारी रात्री ८ वाजताच्या सुमारास घडली. विवाहितेच्या तक्रारीवरून पोलिसांनी हरीश माधवराव गौरकर (वय ४०) याच्याविरुद्ध विनयभंगाचा गुन्हा दाखल केला. हरीश हा विवाहितेवर एकतर्फी प्रेम करायचा. तो तिच्याघरासमोर तास न तास बसायचा. विवाहितेच्या पतीला तो दिसताच हटकले असता हरीशने त्याला मारहाण केली.