चालत्या रेल्वेतून पडून तरुणाचा मृत्यू

• पेपर मिलच्या नाल्यात सापडला मृतदेह

रमेश निषाद - आमचा विदर्भ प्रतिनिधी

बल्लारपूर -

स्थानिक किल्ला वॉर्ड आवारातून जात असलेल्या विसापूर रोडजवळ रेल्वे ट्रॅकखाली तरुणाचा मृतदेह सापडल्याने परिसरात खळबळ उडाली आहे. पोलीस सूत्रांकडून मिळालेल्या माहितीनुसार, रेल्वेमध्ये प्रवास करणारा तरुण चालत्या ट्रेनमधून पडल्यानंतर त्याचा मृतदेह पेपर मिलच्या मागे असलेल्या नाल्यात आढळला. मृतक तेलंगणा राज्यातील कांचीगुडा येथून उत्तर प्रदेशातील संबलकडे जात असताना हा अपघात झाल्याचा अंदाज आहे. त्याच्याकडून रेल्वे प्लॅटफॉर्म तिकीट आणि आधार कार्ड पोलिसांना मिळाले आहे. 

बल्लारपूर पोलिसांनी घटनास्थळी पंचनामा करत मृतदेहाची ओळख साठी दवाखान्यात ठेवला आहे. तरुणाचे नाव मोहमद नन्हे अब्दुल हकीम (२६) रा. रचैता, असमौली, संभल, उत्तर प्रदेश राज्याचा रहिवासी असल्याची माहिती त्याच्याकडे सापडलेल्या आधार कार्डवरून मिळाली आहे, पोलिसांनी याबाबतची नोंद दाखल केली असून पुढील तपास सहायक पोलीस निरीक्षक प्रमोद रासकर करत आहेत.