कोंबड्यांच्या झुंजीचा जुगार पोलिसांनी उधळला; आर्वीत मोठी कारवाई

नाल्यालगत सुरू होता पैशांचा डाव; तीन कोंबडे मृत अवस्थेत आढळले

आमचा विदर्भ - वृत्तसेवा 

चंद्रपूर (दि. ०५ नोव्हेंबर २०२६) -

        लाठी उपपोलीस स्टेशन अंतर्गत येणाऱ्या आर्वी परिसरात कोंबड्यांच्या झुंजीवर पैशांचा जुगार खेळला जात असल्याची माहिती मिळताच लाठी पोलिसांनी धडक कारवाई केली. ३ नोव्हेंबर २०२६ रोजी करण्यात आलेल्या या कारवाईत दोन आरोपींना ताब्यात घेण्यात आले असून, ७ कोंबडे, १२ मोटारसायकली, ४ कात्या आणि रोख रकमेसह एकूण ५ लाख ३ हजार ६५० रुपयांचा मुद्देमाल जप्त करण्यात आला आहे.

        लाठी उपपोलीस स्टेशनचे पोलीस कर्मचारी अशोक मंजुळकर यांना गोपनीय खबऱ्यामार्फत आर्वी गावाच्या मागील बाजूस नाल्यालगत कोंबड्यांच्या झुंजीवर पैशांचा जुगार सुरू असल्याची माहिती मिळाली. माहितीची खातरजमा करून पोलिसांनी सहकारी कर्मचारी आणि पंचांच्या उपस्थितीत घटनास्थळी धाड टाकली. आर्वी गावामागील नाल्याजवळ सुरू असलेल्या कोंबड्यांच्या झुंजीवर पैशांचा डाव खेळला जात असल्याचे पोलिसांच्या कारवाईदरम्यान समोर आले. घटनास्थळावर दोन आरोपी आढळून आले. याप्रकरणी पोलिसांनी दोघांविरुद्ध गुन्हा दाखल केला आहे. पोलिसांनी दिलेल्या माहितीनुसार, या प्रकरणात  प्रवीण सुरेश दरेकर (वय ३५, रा. राजुरा), प्रकाश मोतीराम वानखेडे (वय ६२, रा. विरूर) याना ताब्यात घेण्यात आले आहे. याशिवाय घटनास्थळावरून १० मोटारसायकलींचे चालक फरार झाल्याची नोंद पोलिसांनी केली आहे. जप्त करण्यात आलेल्या संपूर्ण मुद्देमालाची एकूण किंमत ५ लाख ३ हजार ६५० रुपये असल्याची माहिती पोलिसांनी दिली. या प्रकरणी लाठी उपपोलीस स्टेशनमध्ये अप. क्र. ६७/२६ अन्वये महाराष्ट्र जुगार प्रतिबंधक कायद्याच्या कलम १२ (ब) अंतर्गत गुन्हा नोंदविण्यात आला आहे. पुढील तपास पोलिसांकडून सुरू आहे.

        पोलीस अधीक्षक आयुष नोपानी, अपर पोलीस अधीक्षक ईश्वर कातकडे आणि उपविभागीय पोलीस अधिकारी, राजुरा सुशांत कुमार यांच्या मार्गदर्शनाखाली ही कारवाई करण्यात आली. लाठी उपपोलीस स्टेशनचे ठाणेदार तथा सहाय्यक पोलीस निरीक्षक प्रशांत लभाने यांच्या नेतृत्वात पोलीस हवालदार अशोक मंजुळकर, महिला पोलीस हवालदार सौजन्या जंजिरालावार, पोलीस कॉन्स्टेबल चेतना झाडे आणि वनरक्षक कार्तिकस्वामी केंद्रे यांनी या कारवाईत सहभाग घेतला. कोंबड्यांच्या झुंजीवर पैशांचा जुगार खेळण्याच्या प्रकाराविरोधात पोलिसांनी केलेल्या या कारवाईमुळे परिसरात चर्चा सुरू झाली आहे. ग्रामीण भागात अशा प्रकारच्या बेकायदेशीर जुगारांवर नियंत्रण ठेवण्यासाठी पोलिसांनी केलेली ही कारवाई महत्त्वपूर्ण मानली जात आहे.

#ChandrapurNews #RajuraNews #ArviNews #LathiPolice #ChandrapurPolice #CockFightGambling #GamblingRaid #Rajura #Virur #ChandrapurCrimeNews #MaharashtraPolice #PoliceAction #AamchaVidarbha #आर्वी #राजुरा #लाठीपोलीस #चंद्रपूरबातम्या #कोंबड्यांच्याझुंजी #जुगारावरकारवाई #पोलीसकारवाई