दुःखाच्या क्षणी ग्रामगीतेचा आधार; शेषराव येरगुडे यांच्या स्मृतींना अनोखी श्रद्धांजली

श्री गुरुदेव सेवा मंडळ व येरगुडे परिवाराचा भावपूर्ण उपक्रम

आमचा विदर्भ - अनंता गोखरे

ऊर्जानगर (चंद्रपूर) (दि. ०३ ऑक्टॉबर २०२६) -

        पारंपरिक पद्धतीने चौदावीचा कार्यक्रम न करता राष्ट्रसंत तुकडोजी महाराजांच्या ग्रामगीतेतील विचारांचा जागर करीत स्वर्गीय शेषराव कवडूजी येरगुडे यांना भावपूर्ण श्रद्धांजली अर्पण करण्यात आली. श्री गुरुदेव सेवा मंडळ आणि येरगुडे परिवार, ऊर्जानगर यांच्या संयुक्त विद्यमाने स्नेहबंध सभागृह, ऊर्जानगर वसाहत येथे हा श्रद्धांजली कार्यक्रम दुःखद, भावनिक आणि गंभीर वातावरणात पार पडला.

        ऊर्जानगर वसाहतीत मागील सुमारे ३० वर्षांपासून वास्तव्य असलेले श्री गुरुदेव सेवा मंडळाचे सदस्य तथा सामाजिक क्षेत्रातील परिचित व्यक्तिमत्त्व स्वर्गीय शेषराव कवडूजी येरगुडे यांचे १५ सप्टेंबर २०२६ रोजी अचानक निधन झाले. त्यांच्या निधनाने येरगुडे परिवारावर दुःखाचा डोंगर कोसळला. त्याचबरोबर समाजाने एक सोज्वळ व्यक्तिमत्त्व, मार्गदर्शक आणि सल्लागार गमावल्याची भावना यावेळी व्यक्त करण्यात आली.

राष्ट्रसंतांच्या विचारातून चौदावीचा कार्यक्रम

        स्वर्गीय शेषराव येरगुडे यांच्या स्मरणार्थ आयोजित चौदावीचा कार्यक्रम पारंपरिक पद्धतीने न करता राष्ट्रसंत तुकडोजी महाराजांच्या ग्रामगीतेतील विचारांच्या माध्यमातून करण्याचा निर्णय येरगुडे परिवार आणि श्री गुरुदेव सेवा मंडळाने घेतला. राष्ट्रसंत तुकडोजी महाराजांच्या ग्रामगीतेमध्ये एकूण ४१ अध्याय आहेत. त्यापैकी अध्याय क्रमांक २२ असलेल्या ‘अंत्यसंस्कार’ या अध्यायाचे उपस्थितांनी सामूहिक वाचन केले. दुःखाच्या प्रसंगी ग्रामगीतेतील विचारांच्या माध्यमातून जीवन, मृत्यू आणि सामाजिक कर्तव्य यांचा संदेश उपस्थितांपर्यंत पोहोचविण्यात आला.

भजनातून वाहिली भावपूर्ण श्रद्धांजली

        अध्यायाचे सामूहिक वाचन झाल्यानंतर श्री गुरुदेव सेवा मंडळ, ऊर्जानगर यांच्या वतीने राष्ट्रसंत तुकडोजी महाराजांनी लिहिलेल्या अंत्यसंस्कार आणि मृत्युसंस्काराशी संबंधित भजनांचा श्रद्धांजलीपर कार्यक्रम आयोजित करण्यात आला. गंभीर आणि शांत वातावरणात झालेल्या या भजन कार्यक्रमामुळे उपस्थितांचे मन हेलावून गेले. अनेकांच्या डोळ्यांत अश्रू तरळले. भजनाच्या माध्यमातून स्वर्गीय शेषराव येरगुडे यांच्या आठवणींना उजाळा देत त्यांच्या कार्याला भावपूर्ण आदरांजली अर्पण करण्यात आली.

मान्यवरांनी उजाळा दिला जीवनकार्याला

        यावेळी खेमदेवजी कन्नमवार तसेच उपस्थित इतर मान्यवरांनी स्वर्गीय शेषराव येरगुडे यांच्या जीवनकार्यावर प्रकाश टाकला. ऊर्जानगरमध्ये दीर्घकाळ वास्तव्य करताना त्यांनी सामाजिक संबंध जपले तसेच मार्गदर्शक आणि सल्लागार म्हणून अनेकांना सहकार्य केले, अशा भावना यावेळी व्यक्त करण्यात आल्या.

विठ्ठलनामाच्या भैरवीने कार्यक्रमाची सांगता

        श्रद्धांजलीपर कार्यक्रमाची सांगता “विठ्ठल विठ्ठल विठ्ठल बोला | विठ्ठल आले मज नेण्याला |” या श्रद्धांजलीपर भैरवीने करण्यात आली. या वेळी सभागृहातील वातावरण अधिकच भावूक झाले. यानंतर उपस्थित सर्वांनी दोन मिनिटे मौन पाळून स्वर्गीय शेषराव येरगुडे यांना श्रद्धांजली अर्पण केली. कार्यक्रमाच्या अखेरीस येरगुडे परिवाराच्या वतीने उपस्थित नातेवाईकांना राष्ट्रसंत तुकडोजी महाराजांचा ग्रामगीता ग्रंथ भेटस्वरूपात वितरित करण्यात आला. चौदावीच्या निमित्ताने केवळ पारंपरिक विधी न करता राष्ट्रसंत तुकडोजी महाराजांचे विचार कुटुंबीय, नातेवाईक आणि समाजातील उपस्थितांपर्यंत पोहोचविण्याचा प्रयत्न या उपक्रमातून करण्यात आला. दुःखाच्या प्रसंगीही समाजप्रबोधन आणि विचारांची ज्योत तेवत ठेवण्याचा हा प्रयत्न असल्याची भावना उपस्थितांनी व्यक्त केली.

येरगुडे परिवारासह मंडळाच्या पदाधिकाऱ्यांची उपस्थिती

        या भावपूर्ण श्रद्धांजली कार्यक्रमाला संपूर्ण येरगुडे परिवार, नातेवाईक, श्री गुरुदेव सेवा मंडळाचे पदाधिकारी व सदस्य तसेच ऊर्जानगर वसाहतीतील नागरिक मोठ्या संख्येने उपस्थित होते. उपस्थितांनी स्वर्गीय शेषराव येरगुडे यांच्या स्मृतींना अभिवादन करून त्यांच्या परिवाराच्या दुःखात सहभागी होत श्रद्धांजली अर्पण केली.

#शेषरावयेरगुडे #शेषरावकवडूजीयेरगुडे #ऊर्जानगर #चंद्रपूर #ChandrapurNews #Urjanagar #RashtrasantTukdojiMaharaj #ग्रामगीता #ग्रामगीतेचाविचार #श्रीगुरुदेवसेवामंडळ #श्रद्धांजली #भावपूर्णश्रद्धांजली #चौदावी #राष्ट्रसंततुकडोजीमहाराज #गुरुदेवसेवामंडळ #चंद्रपूरबातम्या #मराठीबातम्या #ChandrapurNews #MaharashtraNews