सामाजिक बांधिलकीचा आदर्श; रेड क्रॉसच्या आरोग्य शिबिरात नागरिकांचा मोठा सहभाग
आमचा विदर्भ - वृत्तसेवा
चंद्रपूर (दि. १८ जुलै २०२६) -
इंडियन रेड क्रॉस सोसायटी शाखा चंद्रपूर आणि चंद्रपूर ॲडव्होकेट बार असोसिएशन यांच्या संयुक्त विद्यमाने जिल्हा न्यायालय परिसरात भव्य आरोग्य तपासणी व मोफत औषध वितरण शिबिर उत्साहात पार पडले. चंद्रपूर ॲडव्होकेट बार असोसिएशनचे सदस्य, त्यांचे कुटुंबीय, न्यायालयीन कर्मचारी तसेच परिसरातील नागरिकांसाठी आयोजित करण्यात आलेल्या या शिबिराला मोठ्या संख्येने प्रतिसाद मिळाला. सकाळी १० ते दुपारी २ या वेळेत शिबिराचे आयोजन करण्यात आले.
शिबिरामध्ये विविध तज्ज्ञ डॉक्टरांनी नागरिकांची तपासणी करून आरोग्यविषयक मार्गदर्शन केले. कान-नाक-घसा विकार, स्त्रीरोग, त्वचारोग, दंतरोग, कर्करोग तपासणी, रक्तदाब, मधुमेहासाठी रक्तातील साखर तपासणी, बोन मॅरो डेन्सिटी, किडनी फंक्शन टेस्ट, लिव्हर फंक्शन टेस्ट, हिमोग्लोबिन तपासणी तसेच पॅप स्मिअर टेस्ट अशा विविध महत्त्वाच्या तपासण्या मोफत करण्यात आल्या. तपासणीनंतर आवश्यकतेनुसार रुग्णांना मोफत औषधांचे वितरणही करण्यात आले.
यावेळी मार्गदर्शन करताना इंडियन रेड क्रॉस सोसायटीचे सचिव डॉ. मंगेश गुलवाडे यांनी नियमित आरोग्य तपासणीचे महत्त्व अधोरेखित केले. "प्रतिबंध हाच उपचाराचा श्रेष्ठ उपाय आहे. अनेक गंभीर आजार सुरुवातीच्या टप्प्यात कोणतीही लक्षणे न दाखवता वाढत असतात. त्यामुळे प्रत्येकाने नियमित आरोग्य तपासणी करून घ्यावी. संतुलित आहार, नियमित व्यायाम, पुरेशी झोप, व्यसनमुक्त जीवन आणि मानसिक तणावाचे योग्य व्यवस्थापन हे निरोगी आयुष्याचे पाच आधारस्तंभ आहेत. वेळेत निदान झाल्यास उपचार अधिक प्रभावी होतात आणि गंभीर गुंतागुंत टाळता येते. त्यामुळे अशा रोग निदान शिबिरांचे सातत्याने आयोजन होणे ही काळाची गरज आहे," असे त्यांनी सांगितले.
पुढे बोलताना डॉ. मंगेश गुलवाडे यांनी इंडियन रेड क्रॉस सोसायटी समाजातील प्रत्येक घटकापर्यंत दर्जेदार आरोग्य सेवा पोहोचविण्यासाठी कटिबद्ध असल्याचे सांगितले. भविष्यातही अशा लोकहिताच्या उपक्रमांचे सातत्याने आयोजन करण्यात येईल, असेही त्यांनी स्पष्ट केले. या शिबिराचे नियोजन सचिव डॉ. मंगेश गुलवाडे, उपसचिव डॉ. संजय घाटे, कोषाध्यक्ष सीए शादाब चिनी, प्रोजेक्ट डायरेक्टर अश्विनी खोबरागडे आणि डॉ. आशिष बारबडे यांच्या मार्गदर्शनाखाली करण्यात आले.
चंद्रपूर ॲडव्होकेट बार असोसिएशनचे उपाध्यक्ष ॲड. विक्रम टंडन, उपाध्यक्ष अमन मारेकर, सचिव ॲड. किनीकर, ॲड. गिरीश मारल्यावर, ॲड. आशिष धर्मपरिवार, सदस्य ॲड. बजाज, ॲड. वैशाली कवाडे तसेच स्वयंसेवकांनी शिबिराच्या यशस्वी आयोजनासाठी मोलाचे सहकार्य केले. या आरोग्य शिबिरात डॉ. बी. एच. दाबेरे, डॉ. कल्पना गुलवाडे, डॉ. मनीषा घाटे, डॉ. प्रसाद पोटदुखे, डॉ. चेतन नागरेचा, डॉ. रोहन कोटकर, डॉ. अनुजा कोटकर, डॉ. संदीप पिपरे, डॉ. राहुल नगराळे, डॉ. चैतन्य नंदावरे, डॉ. उमेश सरोसे, डॉ. आयुषी गुप्ता, डॉ. अनुजा लोणकर आणि डॉ. दीक्षाय वाकडे यांची प्रमुख उपस्थिती होती. त्यांनी विविध आजारांबाबत तपासणी करून नागरिकांना आवश्यक वैद्यकीय सल्ला दिला.
या उपक्रमाचा लाभ मोठ्या संख्येने ॲडव्होकेट, त्यांचे कुटुंबीय, न्यायालयीन कर्मचारी आणि नागरिकांनी घेतला. प्राथमिक स्तरावर आरोग्य तपासणी, तज्ज्ञ डॉक्टरांचे मार्गदर्शन आणि मोफत औषधांचा लाभ मिळाल्याने उपस्थितांनी समाधान व्यक्त केले. सेवाभाव, सामाजिक बांधिलकी आणि आरोग्य जनजागृतीचा उत्कृष्ट संगम असलेला हा उपक्रम अत्यंत यशस्वी ठरला.
#Chandrapur #IndianRedCross #RedCross #HealthCamp #FreeHealthCheckup #MedicalCamp #HealthAwareness #PreventiveHealthcare #ChandrapurNews #VidarbhaNews #MaharashtraNews #PublicHealth #Doctors #SocialService #Healthcare #drmangeshgulwade #mangeshgulwade #aamchavidarbha
टिप्पणी पोस्ट करा
Thanks for your response, We will reply you soon, You haven't followed Aamcha Vidarbha yet, you follow Aamcha Vidarbha now.