भद्रावती वनविभागात एसीबीचा सापळा; ₹२० हजारांची लाच स्वीकारताना तिघे रंगेहात

ट्रॅक्टर सोडण्यासाठी मागितली लाच; वनपरिक्षेत्रातील तीन कर्मचाऱ्यांवर एसीबीची कारवाई

आमचा विदर्भ - 

भद्रावती (दि. २७ जुलै २०२६) -

        भद्रावती वनपरिक्षेत्रातील क्षेत्र सहाय्यक, बीट वनरक्षक आणि वनमजूर यांना लाचलुचपत प्रतिबंधक विभागाच्या (एसीबी) पथकाने ₹२० हजारांची लाच स्वीकारताना रंगेहात पकडल्याने वनविभागात एकच खळबळ उडाली आहे. चंद्रपूर येथील एसीबीच्या पथकाने ही कारवाई भद्रावती येथील वनविभागाच्या कार्यालयात नियोजनबद्ध सापळा रचून केली.

        मिळालेल्या माहितीनुसार, वनविभागाने यापूर्वी एका ट्रॅक्टरवर कारवाई करून तो जप्त केला होता. जप्त करण्यात आलेला ट्रॅक्टर सोडून देण्यासाठी क्षेत्र सहाय्यक कोमल गुगलोत आणि बीट वनरक्षक संदीप पारवे यांनी संबंधित ट्रॅक्टर मालकाकडे ₹२० हजारांची लाच मागितल्याची तक्रार लाचलुचपत प्रतिबंधक विभागाकडे करण्यात आली होती.

        तक्रार प्राप्त झाल्यानंतर एसीबीच्या अधिकाऱ्यांनी गोपनीय पडताळणी केली. पडताळणीत तक्रारीतील बाबींना दुजोरा मिळाल्यानंतर पथकाने नियोजनबद्ध सापळा रचला. त्यानुसार, वनमजूर ललित नागपुरे यांच्या माध्यमातून लाचेची रक्कम स्वीकारली जात असताना एसीबीच्या पथकाने धाड टाकून क्षेत्र सहाय्यक कोमल गुगलोत, बीट वनरक्षक संदीप पारवे आणि वनमजूर ललित नागपुरे या तिघांनाही रंगेहात पकडले.

        या कारवाईनंतर संबंधित आरोपींविरुद्ध लाचलुचपत प्रतिबंधक कायद्यानुसार गुन्हा नोंदविण्याची प्रक्रिया सुरू करण्यात आली असून पुढील तपास लाचलुचपत प्रतिबंधक विभागाकडून सुरू आहे. या कारवाईमुळे वनविभागातील कामकाजावर प्रश्नचिन्ह निर्माण झाले असून भद्रावती परिसरात या घटनेची जोरदार चर्चा सुरू आहे.

#Bhadrawati #BhadrawatiNews #Chandrapur #ChandrapurNews #ACB #AntiCorruptionBureau #BriberyCase #ForestDepartment #ForestNews #Corruption #MaharashtraNews #Vidarbha #VidarbhaNews #BreakingNews #LatestNews #CrimeNews #AntiCorruption #LocalNews #MarathiNews #AmchaVidarbha