हातभट्टी अड्ड्यांवर पोलिसांची सर्जिकल स्ट्राइक

२ लाख १७ हजार रुपयांचा मुद्देमाल जप्त; दोन आरोपी फरार

आमचा विदर्भ - दीपक शर्मा

नागभीड (दि. २४ नोव्हेंबर २०२५) -

        पोलीस स्टेशन नागभीड अंतर्गत कान्पा परिसरातील जंगलात सुरू असलेल्या अवैध मोहा हातभट्टी दारू निर्मितीवर पोलिसांनी मोठी कारवाई केली. गोपनीय माहितीच्या आधारे दोन वेगवेगळ्या ठिकाणी धाड टाकून तब्बल २ लाख १७ हजार १०० रुपयांचा मुद्देमाल जप्त करून नष्ट करण्यात आला. या कारवाईत दोन आरोपी घटनास्थळावरून फरार झाले असून त्यांच्याविरुद्ध गुन्हे दाखल करण्यात आले आहेत. पहिल्या ठिकाणी फरार आरोपी आदित्य प्रदीप उके वय २७ वर्षे, रा. कान्पा हा जंगलात हातभट्टी लावून मोहा दारू तयार करताना दिसून आला. त्याच्या ताब्यातून मोहादारू २५० लिटर, मोहाफुल सडवा १८०० लिटर तसेच हातभट्टी साहित्य असा एकूण १,१७,५०० रुपयांचा मुद्देमाल जप्त करण्यात आला. दुसऱ्या ठिकाणी फरार आरोपी रोहित प्रकाश अलोने वय २७ वर्षे, रा. कान्पा हा देखील हातभट्टी लावून मोहा दारू गाळत असताना आढळला. त्याच्याकडून मोहादारू २०५ लिटर, मोहाफुल सडवा १५०० किलो तसेच साहित्य असा एकूण ९९,६०० रुपयांचा मुद्देमाल जप्त करण्यात आला. दोन्ही आरोपींविरुद्ध महाराष्ट्र दारूबंदी अधिनियमानुसार गुन्हे नोंदविण्यात आले. मोहादारू व मोहासडवा हे नाशवंत असल्याने पंचासमक्ष संपूर्ण २,१७,१०० रुपयांचा मुद्देमाल घटनास्थळी नष्ट करण्यात आला.

        ही कारवाई पोलीस अधीक्षक पदावर असलेले मुम्मका सुदर्शन, अपर पोलीस अधीक्षक पदावर असलेले ईश्वर कातकडे, उपविभागीय पोलीस अधिकारी पदावर असलेले राकेश जाधव (उपविभाग ब्रम्हपुरी) यांच्या मार्गदर्शनाखाली करण्यात आली. नागभीड पोलीस स्टेशनचे पोलीस निरीक्षक पदावर असलेले रमाकांत कोकाटे यांच्या नेतृत्वाखाली पोलीस उपनिरीक्षक पदावर असलेले अजिंक्य गोविंदलवार, पोलीस अंमलदार किशोर देशमुख, भरत घोळवे, ज्ञानेश्वर गिरडकर, विशाल पेंदाम, संदीप मडावी तसेच चालक पोलीस हवालदार दामोदर करंबे यांच्या पथकाने ही कारवाई यशस्वी केली. या कारवाईमुळे कान्पा परिसरातील अवैध दारू निर्मितीच्या जाळ्यावर मोठा आघात बसला असून ग्रामीण भागात झालेल्या या धाडीबद्दल नागरिकांनी समाधान व्यक्त केले आहे.

#NaghbhidPoliceAction #IllegalLiquorBust #MahuaDistilleryRaid #AntiLiquorDrive #PoliceOperation #CrimeControl #MahuaLiquor #LawEnforcement #ForestRaid #ChandrapurUpdates #chandrapurnews #chandrapurcity #chandrapur #aamchavidarbha #vidarbha