बानिवाला व्यायामशाळेच्या भूमिपूजनाने तरुणाईसाठी आरोग्यदायी युगाची सुरुवात - आमदार किशोर जोरगेवार

बानिवाला व्यायामशाळेच्या भूमिपूजनाने तरुणाईसाठी आरोग्यदायी युगाची सुरुवात - आमदार किशोर जोरगेवार

बानिवाला व्यायामशाळेचे भूमिपूजन, तरुणांसाठी नवा आरोग्यमंच

आमचा विदर्भ - दीपक शर्मा

चंद्रपूर (दि. २३ जून २०२५) –

        आजच्या धकाधकीच्या जीवनात तरुणांचे मानसिक आणि शारीरिक आरोग्य जपणे काळाची गरज झाली आहे. अशा परिस्थितीत योग्य व्यायाम, सशक्त मार्गदर्शन आणि प्रेरणादायी वातावरण मिळणे अत्यंत महत्त्वाचे ठरते. चंद्रपूरच्या तरुणाईला हे सर्व एका ठिकाणी उपलब्ध व्हावे, यासाठी आमदार किशोर जोरगेवार यांच्या पुढाकाराने दादमहल वॉर्डातील बानिवाला व्यायामशाळेच्या बांधकामाचा भूमिपूजन सोहळा शनिवारी संपन्न झाला.

        या व्यायामशाळेच्या उभारणीसाठी आमदार जोरगेवार यांनी ५० लाख रुपयांचा निधी मंजूर केला असून, ही केवळ एक इमारत नसून तरुणांना शारीरिक सक्षमतेसह मानसिक बळ देणारे एक शिस्तबद्ध प्रशिक्षणकेंद्र ठरेल, असे प्रतिपादन त्यांनी यावेळी केले. भूमिपूजन सोहळ्याला भाजप महानगराध्यक्ष सुभाष कासनगोट्टूवार, प्रदेश निमंत्रित सदस्य तुषार सोम, अजय वैरागडे, राशिद हुसेन, बशीर पठाण, श्याम धोपटे, किरणे ठाकरे, शेखर शेट्टी, नाहिद हुसेन, करणसिंह बैस आदी मान्यवरांची उपस्थिती लाभली होती. कार्यक्रमाला स्थानिक नागरिक आणि युवक मोठ्या संख्येने सहभागी झाले होते.

        आमदार जोरगेवार यांनी आपल्या भाषणात पुढे सांगितले की, "माता महाकाली राज्यस्तरीय बॉडीबिल्डिंग स्पर्धा ही चंद्रपूरसह संपूर्ण महाराष्ट्रात ओळखली जाते. या परंपरेला चालना देण्यासाठी व नवोदित बॉडीबिल्डर तयार करण्यासाठी अत्याधुनिक व्यायामशाळेची उभारणी आवश्यक होती, जी आता साकार होत आहे." ते पुढे म्हणाले, "विकास म्हणजे केवळ रस्ते व इमारती नव्हे, तर योग्य मार्गदर्शन मिळालेल्या युवकांची घडवणूक हाच खरा विकास आहे. बानिवाला व्यायामशाळा ही सामाजिक संकल्पनेचा भाग असून, समाजहिताच्या दिशेने एक भक्कम पाऊल आहे." जोरगेवार यांनी मतदारसंघात व्यायामशाळा, समाजभवने व अभ्यासिका अशा उपक्रमांवर विशेष भर दिला असून, या सुविधांमुळे युवकांना आत्मनिर्भरतेचा मार्ग मोकळा होतो. "आज आपण जे पाऊल टाकले आहे, ते उद्या आपल्या परिसरातील अनेक तरुणांना आरोग्य, आत्मविश्वास आणि राष्ट्रसेवेच्या दिशेने मार्गदर्शक ठरेल," असे उद्गार त्यांनी काढले.