आदर्श शाळेत विद्यार्थ्यांना मिळाले मोफत एसटी पास

आदर्श शाळेत विद्यार्थ्यांना मिळाले मोफत एसटी पास

शाळेतच पास वितरण, राज्य शासनाच्या निर्णयाची अंमलबजावणी राजुरात प्रभावीपणे

आमचा विदर्भ - अनंता गोखरे

राजुरा (दि. २८ जून २०२५) -

        येथील बालविद्या शिक्षण प्रसारक मंडळ द्वारा संचालित आदर्श मराठी प्राथमिक विद्यामंदिर व आदर्श हायस्कूल येथे प्रथमच विद्यार्थ्यांना राज्य परिवहन महामंडळाचे मोफत एसटी बस पास शाळेतूनच वितरित करण्यात आले. या कार्यक्रमात आगार व्यवस्थापक राकेश बोधे, वाहतूक निरीक्षक एस. जी. लाडसे, लिपिक कुलदीप दुबे, मुख्याध्यापिका नलिनी पिंगे (आदर्श मराठी प्राथमिक विद्यामंदिर), मुख्याध्यापक सारीपुत्र जांभूळकर (आदर्श हायस्कूल), राष्ट्रीय हरित सेना विभाग प्रमुख बादल बेले, स्काऊट मास्तर रूपेश चिडे, तसेच सहाय्यक शिक्षक विकास बावणे यांची प्रमुख उपस्थिती होती.

        शालेय वर्ष २०२५-२६ पासून विद्यार्थ्यांना बस पास मिळवताना होणाऱ्या त्रासाचे निर्मूलन व्हावे, पालक व विद्यार्थ्यांचा वेळ वाचावा आणि कार्यालयीन गर्दी टाळावी या हेतूने शासनाच्या सूचनेनुसार शाळेमध्येच पास वितरित करण्याचा निर्णय घेण्यात आला. या उपक्रमाअंतर्गत आदर्श हायस्कूल मधील ३० आणि आदर्श मराठी प्राथमिक विद्यामंदिर मधील २८ विद्यार्थ्यांना बस पास वितरित करण्यात आले. यामुळे विद्यार्थ्यांमध्ये आनंदाचे व उत्साहाचे वातावरण निर्माण झाले होते. या निर्णयाबद्दल राज्य शासन, राज्य परिवहन महामंडळ तसेच राजुरा आगार प्रशासनाचे विद्यार्थ्यांनी आणि शिक्षकांनी आभार मानले. पालकांनीही हा निर्णय स्वागतार्ह व समाधानकारक असल्याचे मत व्यक्त केले.