मुहूर्तावर विवाह लावून आदर्श निर्माण करणाऱ्या कुटुंबाचा माजी आमदार सुदर्शन निमकर यांच्या हस्ते सत्कार

मुहूर्तावर विवाह लावून आदर्श निर्माण करणाऱ्या कुटुंबाचा माजी आमदार सुदर्शन निमकर यांच्या हस्ते सत्कार

आमचा विदर्भ - अनंता गोखरे

राजुरा (दि. ०४ जून २०२५) -

        आजकाल लग्न समारंभात डीजे, फोटोशूट, आणि वेळेचा अपव्यय जास्तच पाहायला मिळतो. पण गडचांदूर येथील एका विवाहाने वेगळाच आदर्श निर्माण केला. लखमापूर येथील विठ्ठलराव खुटमाटे यांची कन्या हिमाणी आणि वणी (जि. यवतमाळ) येथील पांडुरंग मोहितकर यांचे सुपुत्र निलेश यांच्या विवाह सोहळ्यात सकाळी ११:३० वाजता असलेल्या मुहूर्तावर अगदी अचूकपणे विवाह विधी पार पाडले गेले. विवाहाच्या वेळेचे भान राखून ठरलेल्या मुहूर्तावर विवाह लावल्याबद्दल राजुरा विधानसभा मतदारसंघाचे माजी आमदार सुदर्शन निमकर आणि त्यांच्या पत्नी सौ. वर्षा निमकर यांनी दोन्ही कुटुंबाचा आणि नवविवाहित जोडप्याचा शाल, श्रीफळ व पुष्पगुच्छ देऊन सत्कार केला. या प्रसंगी मराठा सेवा संघाचे मार्गदर्शक हरीचंद्र थीपे गुरुजी, गडचांदूरचे व्यापारी अरुण गोरे, भोयेगावचे किसनराव डोंगे, तसेच वधू-वरांचे पालक आणि वऱ्हाडी मंडळी मोठ्या संख्येने उपस्थित होते. हा विवाह सोहळा गडचांदूर परिसरातील एक आदर्श आणि वेळेचे भान ठेवणारा कार्यक्रम ठरला आहे. उपस्थित वऱ्हाड्यांनी वेळेवर विवाह लागल्यामुळे समाधान व्यक्त करत, अशा विवाहांना समाजाने प्रोत्साहन द्यावे अशी भावना व्यक्त केली.