सामाजिक बांधिलकीचं दृष्टीमूल्य – मोफत शस्त्रक्रिया उपक्रमात नवे पर्व

सामाजिक बांधिलकीचं दृष्टीमूल्य – मोफत शस्त्रक्रिया उपक्रमात नवे पर्व

दृष्टीदान हेच श्रेष्ठदान – सुधीर मुनगंटीवार यांच्या उपक्रमाची उजळ कामगिरी

मुनगंटीवार यांच्या हस्ते ५८ रुग्ण नागपूरला रवाना

आमचा विदर्भ - अनंता गोखरे

चंद्रपूर (दि. ०३ जून २०२५) –

        बल्लारपूर विधानसभा मतदारसंघात मोफत नेत्रतपासणी शिबिरांनंतर, शस्त्रक्रियेची आवश्यकता असलेल्या ५८ रुग्णांना नागपूर येथील शालिनीताई मेघे हॉस्पिटल अ‍ॅण्ड रिसर्च सेंटर, वानाडोंगरी येथे रवाना करण्यात आले. यामध्ये मुल येथून ४२ रुग्ण व राजोली येथून १६ रुग्णांचा समावेश आहे. या उपक्रमाचे विशेष वैशिष्ट्य म्हणजे शस्त्रक्रियेपासून ते प्रवास, निवास, भोजन आणि इतर सर्व सोयीसुविधा पूर्णतः मोफत असून, यामागे आहे आमदार श्री. सुधीर मुनगंटीवार यांचा सामाजिक बांधिलकीतून घेतलेला पुढाकार. या शिबिराचे आयोजन श्री माता कन्यका सेवा संस्था, चंद्रपूर व शालिनीताई मेघे हॉस्पिटल, नागपूर यांच्या संयुक्त विद्यमाने करण्यात आले. या शिबिरांमुळे अनेक गरजूंना दृष्टीचे नवजीवन लाभणार आहे. आ. मुनगंटीवार यांच्या पुढाकारातून यापूर्वीही विसापूर, नांदगाव, हळस्ती, बामणी, कळमना, जूनोना, चीचपेल्ली, अजयपूर, कोठारी, दुर्गापूर, इंदिरा नगर, राजोली आणि मुल येथे मोफत नेत्र तपासणी शिबिरे आयोजित करण्यात आली होती, ज्याला नागरिकांचा उत्स्फूर्त प्रतिसाद लाभला. आजपर्यंत आ. मुनगंटीवार यांच्या नेतृत्वात १५,००० हून अधिक मोतिबिंदू शस्त्रक्रिया, ३५,००० हून अधिक मोफत चष्म्यांचे वितरण करण्यात आले. या कार्यातून हजारो नागरिकांना नवदृष्टी प्राप्त झाली असून, त्यांच्या सामाजिक बांधिलकीचा हा एक प्रशंसनीय नमुना आहे.