बुडणाऱ्याला वाचवताना तरुणाचा मृत्यू

बुडणाऱ्याला वाचवताना तरुणाचा मृत्यू

संपूर्ण थरार कॅमेऱ्यात कैद

आमचा विदर्भ - न्यूज नेटवर्क

चंद्रपूर -

तलावावरील बंधाऱ्यावरून एक जण वाहून गेला. तो अडकला असताना त्याला वाचवण्याच्या प्रयत्नात दोन जणांनी आपला जीव धोक्यात टाकला. हा थरार कॅमेऱ्यात कैद झाला. या घटनेत नंदलाल कैथवास (३६) रा. संतोषी माता वॉर्ड बल्लारपूर या तरूणाचा मृत्यू झाला आहे. ही घटना शुक्रवार दि. २९ जुलै ला सायंकाळच्या सुमारास जुनोना येथे घडली.

जुनोना तलाव तुडुंब भरल्याने त्यावर बांधलेला बंधारा ओव्हरफ्लो झाला आहे. यात एक व्यक्ती वाहून गेला. त्याला वाचवण्यासाठी गावकऱ्यांचे शर्थीचे प्रयत्न सुरू होते. दोरीच्या साहाय्याने तो तग धरून होता. त्याला ओढण्याच्या प्रयत्नात दोघांचा तोल गेला. त्यातील एकाला कसेबसे पकडण्यात आले. मात्र दुसरा या प्रवाहात ओढला गेला आणि गटांगळ्या खायला लागल्या. त्याला वाचवण्यासाठी तिसऱ्याने उडी मारली आणि थोड्या वेळात तोदेखील पाण्यात पडला. हा सर्व थरार कॅमेऱ्यात कैद झाला आहे. एकोर्निया या वनस्पतीच्या झुडुपामुळे त्यांना वाचवण्यास अडचण येत होती. 

बल्लारपूर पोलिसांनी घटनास्थळी पोहोचून गर्दीवर नियंत्रण मिळवले, जेसीबीच्या सहाय्याने कचरा हटविण्याचा प्रयत्न करण्यात आला मात्र सर्व प्रयत्न फसले. घटनास्थळी पोलीस बंदोबस्त ठेवण्यात आला आहे, रात्री अंधार जास्त झाल्याने बुडालेल्या तरुणाचा शोध घेण्यात अडचण जात होती. आज पुन्हा शोध मोहीम राबविली जात आहे.