खाणीतून कोळसा घेऊन जाणारा ट्रॅक्टर पकडला ; ६ लाख ३० हजाराचा मुद्देमाल जप्त

• खाणीतून कोळसा घेऊन जाणारा ट्रॅक्टर पकडला
• ६ लाख ३० हजाराचा मुद्देमाल जप्त

आमचा विदर्भ - ब्युरो रिपोर्ट्स

राजुरा -

वेकोलिच्या सास्ती ओपनकास्ट कोळसा खाणींतून कोळसा तस्करांनी कोळसा चोरी करून नेत असताना महाराष्ट्र सुरक्षा दलाचे जवान राहुल राठोड, लक्ष्मण पाटील यांनी नंबर नसलेल्या ट्रॅक्टर ला पाठलाग करून गोवरी कॉलनी वरुन 2 कि.मी. अंतरावर पकडले. 30 हजार रुपये किमतीचा सुमारे 3 टन कोळसा आणि 6 लाख रुपये किमतीचा ट्रॅक्टर असा एकूण 6 लाख 30 हजार रुपयांचा माल जप्त करण्यात आला आहे. 

सुरक्षा रक्षकांनी अधिक विचारपूस करत चौकशी केली असता, चालकाने आपले नाव प्रकाश नरसिंग कामपेल्ली वय 35 वर्ष रा. बल्लारशाह येथील रहिवासी असल्याचे सांगितले. त्याला अटक करण्यात आली. कोळसा माफिया बल्लारपूरचा रहिवासी जगना उर्फ ​​जग्गा याच्या सांगण्यावरून चोरी करत असल्याचे त्याने सांगितले. वरील माहिती महाराष्ट्र सुरक्षा दलाचे सुरक्षा अधिकारी कोंढाळकर व वेकोलिचे सुरक्षा अधिकारी राजूरकर यांना देण्यात आली. आरोपींसह ट्रॅक्टर ट्रॉली आणि कोळसा पोलिसांच्या ताब्यात देण्यात आला आहे. पोलिसांनी कलम ३७९, ३४ अन्वये गुन्हा दाखल केला आहे. वाढत्या चोरीला आळा लावण्याचे काम सुरू असले तरी त्या प्रमाणात सुरक्षा कर्मचारी व पोलिसांचे सहकार्य मिळत नसल्याचे संबंधित यंत्रणेतील काही लोकांचे म्हणणे आहे. तशी कारवाई करण्याची आमची तयारी आहे, मात्र संबंधित विभागांकडून सहकार्य अपेक्षित आहे असे सुरक्षा यंत्रणेतील लोकांनी सांगितले.