ऑनलाइन मतदानाच्या दिशेने पहिलेच पाऊल

• प्रायोगिक चाचणी घेण्याचा विचार
• जाणून घ्या कसा आहे मतदार यादी नाव नोंदणी कार्यक्रम

आयशा - आमचा विदर्भ प्रतिनिधी

नागपूर -

आज विविध क्षेत्रांत हायटेक तंत्रज्ञानाचा वापर होत आहे. लोकशाही प्रक्रियेतील सर्वात मोठा उत्सव असलेल्या निवडणुकाही ऑनलाइन करण्यासंदर्भात विचार सुरू आहे. हा प्रयोग यशस्वी झाला तर कुठूनही ऑनलाइन मतदान करणे शक्य होणार असल्याचे संकेत मुख्य निवडणूक अधिकारी श्रीकांत देशपांडे यांनी दिले.

मतदान प्रक्रिया ऑनलाइन करण्यासंदर्भात अद्याप कुठलाच अंतिम निर्णय घेण्यात आलेला नाही, वा तसा प्रस्तावही सध्या नाही. मात्र, हे शक्य होऊ शकते का, याबाबत चर्चा सुरू आहे. देशातील मोठ्या वर्गाकडे आजही मोबाइल नाही. दुर्गम भागात मोबाइल नेटवर्क पोहोचलेले नाही, अशी विविध आव्हाने आहेत. मात्र या दिशेने सुरुवात करण्याची गरज असल्याचे मत देशपांडे यांनी व्यक्त केले.

कुणीच स्वीकारले नाही आव्हान : ईव्हीएम हॅक होऊ शकते. एकाला मतदान केले तर मत दुसऱ्यालाच जाते असे अनेक आक्षेप यापूर्वी घेण्यात आले. निवडणूक आयोगाने हे आक्षेप वेळोवेळी फेटाळले. ईव्हीएम हॅक करून दाखवा, असे आव्हान देऊनही ते कुणीच स्वीकारले नाही. सर्व पातळ्यांवर ईव्हीएम उत्तीर्ण झाले असल्याचे देशपांडे म्हणाले.

असा आहे मतदार यादी नाव नोंदणी कार्यक्रम

• १ जानेवारी २०२२ या तारखेला १८ वर्षे पूर्ण करणाऱ्यांना मतदार यादीत नाव नोंदवता येणार आहे.
• प्रारूप मतदार यादी : १ नोव्हेंबर
• दावे आणि हरकती सादर करणे : १ नोव्हेंबर ते ३० नोव्हेंबर
• विशेष मतदार नोंदणी मोहीम : १३, १४, २७, २८ नोव्हेंबर
• विशेष ग्रामसभा : १६ नोव्हेंबर
• अंतिम मतदार यादी : ५ जानेवारी २०२२