जिल्ह्यात अवैध तंबाकू विक्री जोमात अन्न व भेसळ विभाग कोमात

• अवैध सुगंधित तंबाकू विक्री करणाऱ्यांवर कारवाईची मागणी

शशी ठक्कर - आमचा विदर्भ प्रतिनिधी

चंद्रपूर -

शासनाने सुगंधित तंबाकू, गुटका यावर बंदी घातलेली असतांना चंद्रपूर जिल्ह्यात खुलेआम गुटका विक्री होत असल्याचे दिसून येत आहे. जेव्हापासुन शासनाने गुटका व तंबाकू विक्री लागू केली तेव्हा पासून या व्यवसायात असलेले माफिया गब्बर होत असून त्यांच्याकडे संबंधित विभागाचे अर्थपूर्ण दुर्लक्ष होत असल्याचे बोलले जात आहे. संबंधित विभागाच्या अश्या प्रकारामुळे नागरिकांत संताप व्यक्त करण्यात येत आहे. 

महाराष्ट्र शासनाने मोठा गाजावाजा करत राज्यात तंबाकू व गुटका बंदी केली. त्यावेळी अनेक स्तरावरून या निर्णयाचे स्वागत करत आनंद व्यक्त करण्यात आला मात्र हा आनंद अवघ्या काही दिवसासाठीच राहिला. बंदीनंतर या व्यवसायात  सुगंधित तंबाकू व गुटका माफियांची साखळी तयार होऊन आज अगदी खेड्यापाड्यात बिनधास्तपणे किराणा दुकानातूनही खर्रा विक्री सुरु आहे. त्याचा प्रत्यय जिल्ह्यातील सर्वच गाव खेड्यात पाहावयास मिळत आहे. संबंधित विभागाने लाकडे लक्ष देऊन कठोर कारवाई करावी अशी मागणी होत आहे.