नातवाला पाहण्यासाठी निघालेले आजी-आजोबा अपघातात जागीच ठार

• नवजात नातवाला पाहण्यासाठी जात असलेल्या आजी-आजोबाच्या दुचाकीला अज्ञात वाहनाने दिली धडक

रक्षक पाटील - आमचा विदर्भ प्रतिनिधी

यवतमाळ -

नवजात नातवाला पाहण्यासाठी जात असलेल्या आजी-आजोबाच्या दुचाकीला समोरून येणाऱ्या अज्ञात वाहनाने धडक दिली. या अपघातात दोघेही जागीच ठार झाले. नागपूर-तुळजापूर राष्ट्रीय महामार्गावर महागावजवळील मुडाना-बिजोरा गावादरम्यान सकाळी १० वाजताच्या सुमारास ही घटना घडली.

मोहन भगाजी टेकाळे (६५) व अनुसया मोहन टेकाळे (६०), अशी मृतांची नावे आहेत. मूळचे नांदेड जिल्ह्यातील रहिवासी असलेले टेकाळे गेल्या १५ वर्षांपासून पत्नीसह सवना येथे स्थायिक झाले. त्यांचा एक मुलगा अभियंता असून दुबईत राहतो. तर दुसरा मुलगा भिवंडीत एसटी महामंडळात चालक आहे. दोन दिवसापूर्वी त्यांच्या उमरखेड येथील मुलीला मुलगा झाल्याचे समजल्याने नातवाला पाहण्यासाठी सकाळी निघाले. दुचाकीवरून जात असताना त्यांच्या गाडीला अज्ञात वाहनाने धडक दिली. यात गंभीर जखमी झाल्याने त्यांचा मृत्यू झाला. पोलिसांना माहिती होताच त्यांनी घटनास्थळ गाठून दोघांचेही मृतदेह शवविच्छेदनासाठी सवना येथील शासकीय रुग्णालयात पाठविले. पोलिस दुचाकीला धडक देण्याऱ्या अज्ञात वाहनाचा शोध घेत आहेत.