डॉक्टर दाम्पत्याला मागितली एक कोटीची खंडणी

• महिला फॅशन डिझायनर गजाआड

आयशा - आमचा विदर्भ प्रतिनिधी

नागपूर -

मुलांच्या अपहरणाची भीती दाखवून डॉक्टर दाम्पत्याला एक कोटीच्या खंडणीची मागणी करणाऱ्या महिला फॅशन डिझायनरला बेलतरोडी पोलिसांनी अटक केली. 

शीतल इटनकर वय ४६, रा. मनीषनगर असे अटकेतील महिलेचे नाव आहे. शीतलचे पती बीएसएनएलमध्ये अभियंता आहेत. डॉ. तुषार सदाशिव पांडे वय ४८, रा. सोमलवाडा यांच्या तक्रारीवरून पालिसांनी ही कारवाई केली.

तुषार यांच्या पत्नीही डॉक्टर असून दोघांचे जयहिंद सोसायटीत उत्कर्ष मॅटर्निटी होम नावाचे हॉस्पिटल आहे. ११ जूनला तुषार यांना कुरिअरद्वारे चिठ्ठी मिळाली. तुमची मुलगी व मुलाला सुरक्षित पाहायचे असेल तर एक कोटी रुपयांची खंडणी द्यावी लागेल, खंडणी न दिल्यास वाईट परिणाम होतील, अशी धमकी त्यांना देण्यात आली. तुषार यांनी बेलतरोडी पोलिसांना माहिती दिली. पोलिस उपायुक्त डॉ. अक्षय शिंदे, साहाय्यक पोलिस आयुक्त नीलेश पालवे यांच्या मार्गदर्शनाखाली वरिष्ठ पोलिस निरीक्षक विजय आकोत, उपनिरीक्षक विकास मनपिया, हेडकॉन्स्टेबल तेजराम देवळे, अविनाश ठाकरे, रणधीर दीक्षित, शैलेश बडोदेकर, मिलिंद पटले, वंदना लोटे, गोपाल देशमुख, कमलेश गणेर, बजरंग जुनघरे, नितिन बावने, प्रशांत सोनुलकर, राजेंद्र नागपुरे, कुणाल लांडगे, सायबर विभागाचे दीपक तऱ्हेकर व मिथुन नाईक यांनी धमकीची चिठ्ठी पाठविणाऱ्याचा शोध सुरू केला. सुरुवातीला पोलिसांनी कुरिअर कंपनीत चौकशी केली. त्यानंतर परिसरातील सीसीटीव्ही फुटेज तपासले. पोलिसांना एक महिला ९५९३ या क्रमांकाच्या मोपेडवर जाताना दिसली. शोध घेतला असता मोपेड मनीषनगर परिसरात गेल्याचे आढळले. पोलिसांनी मनीषनगरमध्ये या मोपेडचा शोध सुरू केला. मंगळवारी रात्री पोलिसांना मोपेड आढळली. बुधवारी सकाळी पोलिसांनी शीतलला अटक केली. तिची १९ पर्यंत पोलिस कोठडी घेतली.

५० लाखांचे कर्ज फेडण्यासाठी...

शीतलला दोन मुली आहेत. तिच्या पतीने घर बांधण्यासाठी ५० लाख रुपयांचे कर्ज घेतले. ते फेडण्यासाठी शीतलने खंडणी मागण्याचा कट आखला. काही महिन्यांपूर्वी शीतल व तिच्या पतीला करोना झाला होता. यावेळी डॉ. तुषार व त्यांच्या पत्नीने शीतल व तिच्या पतीवर उपचार केले. त्यामुळे शीतलने डॉ. तुषार यांना खंडणी मागण्याचा कट आखला. शीतलने एक कोटीच्या खंडणीची मागणी केली. १७ जूनला पहाटे ४ वजताच्या सुमारास पैसे असलेली बॅग मनीषनगरमधील एका रिकाम्या प्लॉटमध्ये ठेवायला तिने सांगितले होते. हा प्लॉट शीतलच्या घराला लागूनच आहे.