डॉक्टरसह दोघांना मारहाण ; हॉस्पिटलमध्ये तोडफोड करून काउंटरला लावली आग

• करोनाबाधित महिलेच्या मृत्यूनंतर नातेवाइकांनी घातला गोंधळ

आयशा - आमचा विदर्भ कार्यालय प्रतिनिधी

नागपूर -

करोनाबाधित महिलेच्या मृत्यूनंतर नातेवाइकांनी गोंधळ घालत कामठी मार्गावरील होप हॉस्पिटलच्या डॉक्टरसह दोघांना मारहाण केली. हॉस्पिटलमध्ये तोडफोड करून काउंटरला आग लावली. शनिवारी दुपारी ३.३० वाजताच्या सुमारास घडलेल्या या घटनेने हॉस्पिटलमधील अन्य रुग्ण व त्यांच्या नातेवाइकांमध्ये खळबळ उडाली. याप्रकरणी पाचपावली पोलिसांनी गुन्हा दाखल केला आहे.

पोलिसांकडून मिळालेल्या माहितीनुसार, काही दिवसांपूर्वी पिवळी नदी परिसरात राहणाऱ्या सुनीता पाली यांची प्रकृती खालावली. नातेवाइकांनी त्यांना होप हॉस्पिटलमध्ये दाखल केले. चाचणीदरम्यान पाली या करोनाबाधित असल्याचे निष्पन्न झाले. त्यांच्यावर उपचार सुरू असताना शनिवारी सकाळी १०.३० वाजताच्या सुमारास त्यांचा मृत्यू झाला. करोनाबाधित असल्याने नियमानुसार डॉक्टर बी. के. मुरली यांनी महापालिकेच्या आरोग्य विभागाला माहिती दिली. नियमानुसार प्रक्रिया पूर्ण व्हायला विलंब होत असल्याने पाली यांचे नातेवाईक संतापले. मृतदेह ताब्यात देण्याची मागणी नातेवाइकांनी डॉ. मुरली यांना केली. प्रक्रिया पूर्ण झाल्याशिवाय मृतदेह ताब्यात देण्यात येणार नाही, असे मुरली यांनी नातेवाइकांना सांगितले. पाली यांचे नातेवाइक संतापले. त्यांनी डॉ. मुरली यांना धक्काबुक्की सुरू केली. अन्य एक कर्मचारी मदतीसाठी धावला. त्यालाही पाली यांच्या नातेवाइकांनी मारहाण केली. हॉस्पिटलमध्ये तोडफोड करून काउंटरला आग लावली. घटनेची माहिती मिळताच पाचपावलीचे वरिष्ठ पोलिस निरीक्षक किशोर नगराळे यांच्यासह पोलिसांचा ताफा तेथे पोहोचला. दंगल नियंत्रण पथकालाही पाचारण करण्यात आले. पोलिसांनी ओमप्रकाश शाहूसह नऊजणांना ताब्यात घेतले. याप्रकरणी पाचपावली पोलिसांनी मारहाण, जाळपोळीसह विविध कलमान्वये गुन्हा दाखल केला.