आमचा विदर्भ -
चंद्रपूर / कोरपना (दि. २० नोव्हेंबर २०२६) -
जिल्ह्यात अवैध रेती उत्खनन आणि गौण खनिजाच्या चोरट्या वाहतुकीला आळा घालण्यासाठी चंद्रपूर जिल्हा पोलिसांनी विशेष मोहीम हाती घेतली आहे. पोलीस अधीक्षक आयुष नोपानी आणि अपर पोलीस अधीक्षक ईश्वर कातकडे यांच्या मार्गदर्शनाखाली राबविण्यात येत असलेल्या या मोहिमेत स्थानिक गुन्हे शाखा आणि पोलीस ठाण्यांच्या पथकांनी धडक कारवाई केली. १८ आणि १९ नोव्हेंबर रोजी भद्रावती आणि बल्लारपूर येथे करण्यात आलेल्या दोन स्वतंत्र कारवायांमध्ये टिप्पर व हायवा ट्रकसह एकूण ४५ लाख ६६ हजार रुपयांचा मुद्देमाल जप्त करण्यात आला. या कारवाईत तीन जणांना ताब्यात घेण्यात आले आहे.
भद्रावतीत २०.१० लाखांचा मुद्देमाल जप्त
स्थानिक गुन्हे शाखा, चंद्रपूर येथील पथकाने १८ नोव्हेंबर २०२६ रोजी गोपनीय माहितीच्या आधारे भद्रावती पोलीस ठाण्याच्या हद्दीत अवैध गौण खनिज वाहतुकीविरोधात नाकाबंदी करून कारवाई केली. या कारवाईदरम्यान अवैधरित्या रेतीची वाहतूक करणारा टाटा हाफटन टिप्पर पोलिसांनी पकडला. याप्रकरणी ऋषिकेश बंडू गोरे (वय २९, रा. खापरी वॉर्ड, शारदा माता मंदिर परिसर, भद्रावती, जि. चंद्रपूर) याला ताब्यात घेण्यात आले.
पोलिसांनी जप्त केलेल्या मुद्देमालाचा तपशील पुढीलप्रमाणे आहे.
- टाटा हाफटन टिप्पर क्रमांक MH 34 BZ 9750 – किंमत २० लाख रुपये.
- २ ब्रास रेती – किंमत १० हजार रुपये.
या कारवाईत एकूण २० लाख १० हजार रुपयांचा मुद्देमाल जप्त करण्यात आला. याप्रकरणी भद्रावती पोलीस ठाण्यात अप. क्र. १०७६/२०२६ अन्वये भारतीय न्याय संहिता कलम ३०३ (२) तसेच जमीन महसूल संहिता कलम ४८ (७) आणि ४८ (८) अंतर्गत गुन्हा नोंदविण्यात आला आहे.
बल्लारपूरमध्ये हायवा ट्रकसह २५.४५ लाखांचा मुद्देमाल जप्त
दुसरी कारवाई १९ नोव्हेंबर २०२६ रोजी बल्लारपूर पोलीस ठाण्याच्या पथकाने गोपनीय माहितीच्या आधारे केली. अवैधरित्या रेतीची वाहतूक करणाऱ्या हायवा ट्रकवर पोलिसांनी कारवाई करत चालक आणि मालकाला ताब्यात घेतले. या प्रकरणात हायवा चालक मोहित विलास गज्जलवार (रा. चेक बल्लारपूर, ता. पोंभुर्णा) आणि हायवा मालक मनोज निखारे (रा. चिंतलधाबा, ता. पोंभुर्णा) यांना ताब्यात घेण्यात आले.
कारवाईदरम्यान जप्त करण्यात आलेल्या मुद्देमालाचा तपशील पुढीलप्रमाणे आहे.
- हायवा ट्रक क्रमांक MH 34 CQ 2652 – किंमत २५ लाख रुपये.
- ८ ब्रास रेती – किंमत ४५ हजार रुपये.
या कारवाईत एकूण २५ लाख ४५ हजार रुपयांचा मुद्देमाल जप्त करण्यात आला. याप्रकरणी बल्लारपूर पोलीस ठाण्यात अप. क्र. १०९९/२०२६ अन्वये भारतीय न्याय संहिता कलम ३०३ (२), ३ (५) तसेच जमीन महसूल संहिता कलम ४८ (७) अंतर्गत गुन्हा नोंदविण्यात आला आहे.
रेतीघाटांवर स्थानिक गुन्हे शाखेची विशेष तपासणी
अवैध रेती उत्खनन आणि वाहतुकीवर नियंत्रण मिळविण्यासाठी १९ नोव्हेंबरच्या रात्री स्थानिक गुन्हे शाखा, चंद्रपूरच्या पथकांनी जिल्ह्यातील विविध रेतीघाटांवर विशेष तपासणी मोहीम राबविली. या मोहिमेदरम्यान कोसंबी, मोरवाही, चितेगाव, मरेगाव, हळदी, आकापूर, दहेगाव यांसह इतर रेतीघाटांची तपासणी करण्यात आली. जिल्ह्यातील रेतीघाटांवर अवैध उत्खनन किंवा वाहतूक होत असल्यास त्यावर कारवाई करण्यासाठी पोलिसांकडून सातत्याने लक्ष ठेवण्यात येत आहे. पुढील काळातही ही तपासणी आणि कारवाई सुरू राहणार असल्याचे पोलीस विभागाने स्पष्ट केले आहे.
अवैध रेती व्यवसायाविरोधात पोलिसांची मोहीम तीव्र
जिल्ह्यातील नैसर्गिक साधनसंपत्तीचे संरक्षण करणे आणि अवैध गौण खनिज उत्खनन व वाहतुकीला आळा घालणे हा या विशेष मोहिमेचा उद्देश आहे. दोन दिवसांत झालेल्या कारवायांमुळे अवैध रेती वाहतुकीविरोधात पोलीस यंत्रणा सक्रिय झाल्याचे दिसून येत आहे. पोलीस अधीक्षक आयुष नोपानी आणि अपर पोलीस अधीक्षक ईश्वर कातकडे यांच्या मार्गदर्शनाखाली जिल्हा पोलीस प्रशासनाकडून ही मोहीम राबविण्यात येत असून, अवैध रेती उत्खनन आणि वाहतुकीत सहभागी असलेल्यांविरुद्ध कायदेशीर कारवाई करण्यावर भर दिला जात आहे.
#ChandrapurNews #ChandrapurPolice #Chandrapur #IllegalSandMining #SandMafia #SandSmuggling #BhadravatiNews #BallarpurNews #LocalCrimeNews #MaharashtraPolice #ChandrapurCrime #VidarbhaNews #AamchaVidarbha #रेतीतस्करी #अवैधरेतीउत्खनन #चंद्रपूरपोलीस #चंद्रपूरबातमी #भद्रावती #बल्लारपूर #पोलीसकारवाई #रेतीमाफिया #गौणखनिज #चंद्रपूरन्यूज

टिप्पणी पोस्ट करा
Thanks for your response, We will reply you soon, You haven't followed Aamcha Vidarbha yet, you follow Aamcha Vidarbha now.