औपचारिकता नव्हे, बदलाची पायरी ठरावी सेवा पंधरवाडा – डॉ. ओमप्रकाश गोंड

सेवा पंधरवाडा मोहिमेअंतर्गत तहसील प्रशासनाची गावोगावी थेट भेट

शासनाच्या योजनांचा थेट लाभ गरजूंना पोहोचवण्यासाठी तहसील प्रशासनाचा प्रयत्न

आमचा विदर्भ - दीपक शर्मा

राजुरा (दि. २७ सप्टेंबर २०२५) -

         राजुरा तालुक्यात छत्रपती शिवाजी महाराज महाराजस्व अभियान व सेवा पंधरवाडा मोहिमेच्या चौकटीत तहसील प्रशासनाने थेट गावोगावी हजेरी लावली. पंचाळा, धानोरा, चिंचोली आदी गावांना तहसीलदार डॉ. ओमप्रकाश गोंड यांनी भेट देऊन नागरिकांशी संवाद साधला. शासनाच्या विविध योजनांचे प्रत्यक्ष पुनरावलोकन, अडचणींचे निराकरण व पारदर्शकतेने योजना राबवण्याचा संकल्प या दौऱ्यात अधोरेखित झाला.

शेत व पांदण रस्त्यांचे सीमांकन सुरू

        गावोगावी शेतकऱ्यांच्या सोयीसाठी वापरले जाणारे रस्ते व पांदण अधिकृत नकाशावर आणण्यासाठी सर्वेक्षण सुरू करण्यात आले आहे. या प्रक्रियेत प्रत्येक रस्त्याला क्रमांक देऊन गाव नमुना १ फ तयार केला जाणार आहे. जमीनविषयक वाद मिटवणे आणि शेती उत्पादन बाजारात पोहोचवणे यासाठी हा उपक्रम अत्यंत उपयुक्त ठरेल, असे तहसीलदारांनी स्पष्ट केले. महसूल विभागाला पारदर्शक नोंदणीचे आदेशही दिले गेले.

घरकुल योजनांचा आढावा – पात्रांना पट्टे देण्याचे निर्देश

        ‘सर्वांसाठी घरे’ या महत्वाकांक्षी उपक्रमांतर्गत तहसीलदारांनी पात्र लाभार्थ्यांची यादी पुन्हा तपासून त्यांना घरकुल पट्टे देण्याचे निर्देश दिले. अनेक कुटुंबे अजूनही या योजनेपासून वंचित असल्याने त्यांचा प्राधान्याने विचार करण्याचा निर्धार प्रशासनाने व्यक्त केला.

शेतकऱ्यांच्या नुकसानीची पाहणी

        तालुक्यातील सातत्यपूर्ण पावसामुळे सोयाबीन, कापूस, तुरीसह विविध पिकांचे नुकसान झाले आहे. तहसीलदार डॉ. गोंड यांनी शेतकऱ्यांची भेट घेऊन नुकसानीची पाहणी केली. शासनाकडून मदत लवकरच शेतकऱ्यांच्या खात्यात जमा होईल, असे त्यांनी सांगितले. पंचनामे तातडीने पूर्ण करण्याचे निर्देशही जिल्हा प्रशासनाला दिले आहेत.

फार्मर आयडीची सक्ती – जनजागृतीला नागरिकांचा प्रतिसाद

        शेतकऱ्यांना शासकीय योजनांचा लाभ मिळवण्यासाठी फार्मर आयडी अनिवार्य असल्याचे तहसीलदारांनी स्पष्ट केले. ग्रामसभांमधून याबाबत जनजागृती करण्यात आली. आयडी नसल्यास कोणत्याही योजनेचा लाभ घेता येणार नाही, असे सांगून नागरिकांना कागदपत्रे वेळेत सादर करण्याचे आवाहन करण्यात आले. गावोगावी झालेल्या संवाद बैठकीत शेतकरी, महिला, तरुण व कामगार यांचे प्रश्न संयमाने ऐकले गेले. थेट संवाद व तत्काळ प्रतिसाद या मोहिमेची वैशिष्ट्ये ठरली. शासन-प्रशासन व नागरिक यांच्यातील नाते अधिक सशक्त होत असल्याची छाप उमटली.

विकास व न्यायाचा निर्धार

        “सेवा पंधरवाडा ही औपचारिकता न ठरता बदलाची ठोस पायरी ठरावी,” असे तहसीलदार डॉ. ओमप्रकाश गोंड यांनी स्पष्ट केले. शेतकऱ्यांच्या खात्यात मदतीची रक्कम वेळेत जमा करणे, घरकुल योजना पूर्णत्वास नेणे, शेतरस्त्यांची समस्या सोडवणे यासाठी प्रशासन वचनबद्ध असल्याचे त्यांनी नमूद केले.

#SevaFortnight #RajuraDevelopment #FarmersFirst #VillageOutreach #HousingForAll #FarmerSupport #PeopleCentricGovernance #dromprakashgond #tahasilkaryalayrajura #chandrapurnews #chandrapurcity #chandrapur #aamchavidarbha #vidarbha