मोतीबिंदू शिबिरातून २५ ज्येष्ठांना नवी दृष्टीची आशा

मोतीबिंदू शिबिरातून २५ ज्येष्ठांना नवी दृष्टीची आशा

एकदंत गणेश मंडळ व जिल्हा रुग्णालयाचा समाजोपयोगी उपक्रम

आमचा विदर्भ - अनंता गोखरे 

राजुरा (दि. ०५ सप्टेंबर २०२५) -

        दृष्टीदोषामुळे जगण्याची गुणवत्ता कमी होत असलेल्या ज्येष्ठ नागरिकांना आरोग्यसेवेचा दिलासा मिळावा, यासाठी एकदंत गणेश मंडळ, राजुरा आणि जिल्हा सामान्य रुग्णालय, चंद्रपूर यांच्या संयुक्त विद्यमाने दिनांक ३१ ऑगस्ट रोजी (रविवार) मोतीबिंदू (कॅटरॅक्ट) तपासणी व शस्त्रक्रिया शिबिराचे आयोजन करण्यात आले. या शिबिरात अपेक्षेपेक्षा जास्त प्रतिसाद मिळून एकूण २५ ज्येष्ठ रुग्णांची मोफत तपासणी करण्यात आली.

        शिबिरात नेत्रतज्ज्ञांनी अत्याधुनिक उपकरणांच्या सहाय्याने नेत्रतपासणी केली. तपासणीनंतर मोतीबिंदू शस्त्रक्रियेची गरज असलेल्या रुग्णांची यादी तयार करण्यात आली. या यादीतील २५ रुग्णांना पुढील शस्त्रक्रियेसाठी ३ सप्टेंबर रोजी चंद्रपूर जिल्हा सामान्य रुग्णालयात पाठविण्यात आले. शस्त्रक्रियेनंतर रुग्णांना मोफत लेन्स बसवून औषधोपचार व आवश्यक मार्गदर्शन दिले जाणार आहे.

       एकदंत गणेश मंडळाच्या या समाजोपयोगी उपक्रमामुळे आर्थिक अडचणींमुळे दर्जेदार नेत्रउपचारापासून वंचित राहणाऱ्या अनेक गरजू रुग्णांना मोठा दिलासा मिळाला आहे. ग्रामीण आणि शहरी भागातील ज्येष्ठ नागरिकांना जीवनाला नवी दिशा देणारी ही संधी ठरली.

      रुग्णांच्या सोयीसाठी स्वयंसेवकांनी शिबिरात संपूर्ण प्रक्रियेत सहकार्य केले, तर जिल्हा सामान्य रुग्णालयातील वैद्यकीय अधिकारी आणि कर्मचारी यांनी काटेकोर तपासणी करून दुर्बल घटकांना नवा दिलासा दिला. आरोग्यसेवेच्या क्षेत्रात शासकीय रुग्णालये आणि स्थानिक सामाजिक संस्था एकत्र येऊन राबवलेला हा उपक्रम म्हणजे समाजाभिमुख कार्याचा आदर्श ठरला आहे. शिबिराच्या यशस्वी आयोजनानंतर भविष्यात अशा अधिक उपक्रमांची अपेक्षा नागरिकांनी व्यक्त केली असून, दृष्टी परत मिळवण्याच्या आशेने अनेक ज्येष्ठांच्या डोळ्यांमध्ये आनंदाश्रू दाटले.

#EyeCare #CataractCamp #FreeTreatment #Rajura #Chandrapur #HealthForAll #CommunityService #VisionForElderly #chandrapurnews #chandrapurcity #chandrapur #aamchavidarbha #vidarbha