चंद्रपूरच्या स्पंदन रोहणकरची NDA Flying Officer पदासाठी निवड
राष्ट्रीय स्तरावर २५५ वा क्रमांक
आमचा विदर्भ - अनंता गोखरे
चंद्रपूर (दि. १३ जून २०२५) –
जिल्ह्यातील स्पंदन विजय रोहणकर याने केंद्रीय लोकसेवा आयोगाद्वारे (UPSC) घेण्यात आलेल्या राष्ट्रीय संरक्षण अकादमी (NDA) परीक्षेत यश मिळवत एअर फोर्स फ्लाइंग ऑफिसर पदासाठी निवड करून राष्ट्रीय स्तरावर आपली छाप पाडली आहे. त्याने २५५ वा क्रमांक मिळवून चंद्रपूरसह संपूर्ण विदर्भाचे नाव उज्ज्वल केले आहे.
स्पंदनच्या यशाबद्दल औरंगाबाद, नागपूर, चंद्रपूर आणि यवतमाळ जिल्ह्यांमध्ये विविध संस्थांकडून त्याचा सत्कार करण्यात आला. चंद्रपूर येथे नुकत्याच झालेल्या एका कार्यक्रमात जिल्ह्याचे पालकमंत्री ना. डॉ. अशोक उईके आणि आमदार करण देवतळे यांच्या हस्ते सीडीसीसी बँकेच्या सभागृहात त्याचा सत्कार करण्यात आला. त्यांना सन्मानचिन्ह आणि पुष्पगुच्छ देत शुभेच्छा दिल्या गेल्या. स्पंदनने आपले शिक्षण चांदा पब्लिक स्कूल (इयत्ता १ ली ते ८ वी), सैनिकी शाळा बल्लारशाह (९ वी-१० वी), आणि एसपीआय औरंगाबाद (११ वी-१२ वी) येथे पूर्ण केले. त्याने १२ वी नंतर NDA परीक्षा उत्तीर्ण करत भारतात २५५ वा क्रमांक मिळवला.
स्पंदनच्या यशामागे त्याचे कुटुंब मोठ्या आधारस्तंभासारखे उभे राहिले. वडील विजय रोहणकर हे प्राध्यापक, आई एक वृत्तपत्राची संपादक तर आजोबा डी.के. आरीकर हे ख्यातनाम समाजसेवक आहेत. स्पंदनने आपल्या यशाचे श्रेय आई-वडील, आजी-आजोबा आणि शिक्षकवर्गाला दिले असून, "देशसेवा हीच माझी प्रामाणिक जबाबदारी" असल्याचे भावनिक उद्गार काढले. त्याच्या या गौरवपूर्ण निवडीमुळे चंद्रपूर जिल्ह्यात आणि विदर्भात आनंदाची लाट पसरली आहे. विविध स्तरांतील सामाजिक संघटना, शैक्षणिक संस्था आणि नागरिकांनी त्याला पुढील वाटचालीसाठी शुभेच्छांचा वर्षाव केला आहे.
टिप्पणी पोस्ट करा
Thanks for your response, We will reply you soon, You haven't followed Aamcha Vidarbha yet, you follow Aamcha Vidarbha now.