लवकरच रस्ते दुरुस्ती व गरीबांच्या मदतीवर भर

लवकरच रस्ते दुरुस्ती व गरीबांच्या मदतीवर भर

मीट द प्रेस मध्ये चंद्रपूर जिल्हाधिकारी  विनय गौडा जी.सी. यांची माहिती

आमचा विदर्भ - अनंता गोखरे

चंद्रपूर (दि. २९ मार्च २०२५)

        चंद्रपूर शहरातील महापालिकेच्या अमृत योजनेच्या दुसऱ्या टप्प्यांतर्गत रस्त्यांचे खोदकाम सुरू असून, त्याचा फटका नागरिकांना बसत आहे. अपूर्ण रस्त्यांमुळे अपघात वाढले आहेत. या पार्श्वभूमीवर महापालिका आयुक्तांसोबत नुकतीच बैठक घेण्यात आली असून, पुढील दोन आठवड्यांत रस्त्यांच्या दुरुस्तीचे कार्यादेश (वर्क ऑर्डर) काढण्यात येणार असल्याची माहिती जिल्हाधिकारी विनय गौडा जी.सी. यांनी "मीट द प्रेस" कार्यक्रमात दिली.

रस्त्यांच्या दुरुस्तीला प्राधान्य

        महापालिकेच्या योजनेंतर्गत खोदले गेलेले रस्ते अपूर्ण अवस्थेत सोडले जात असल्याने अपघातांचे प्रमाण वाढले आहे. याकडे गांभीर्याने लक्ष देत लवकरच रस्त्यांच्या डांबरीकरणाचे आदेश दिले जातील. पुढील आठवडाभरात दुरुस्तीची प्रक्रिया सुरू होईल.

गरीब आणि निराधारांसाठी मदतीचा हात

        जिल्हाधिकारी गौडा यांनी सांगितले की, प्रशासनाच्या विविध योजनांद्वारे गरिबांना घरे मिळत असून, त्यांच्या चेहऱ्यावरील हास्य पाहून समाधान मिळते. भूमाफियांच्या कारवायांना आळा घालण्यासाठी महानगरपालिका आणि तहसीलदार कार्यालयाने कठोर पावले उचलली आहेत.

रेती तस्करी आणि प्रदूषण नियंत्रणावर भर

        चंद्रपूर जिल्ह्यात वाढत्या रेती तस्करीविरोधात कठोर कारवाई केली जात असून, जप्त केलेली रेती घरकुल योजनेसाठी वापरण्यात येत आहे. राज्य शासनाच्या नव्या धोरणांनुसार लवकरच रेती घाटांचा लिलाव सुरू केला जाईल. तसेच, शहरातील सीटीपीएस आणि औद्योगिक प्रदूषणावर नियंत्रण मिळवण्यासाठी नव्या उपाययोजना राबवण्यात येतील.

मराठी भाषेच्या वापरावर भर

      राज्य सरकारने सर्व सरकारी कार्यालयांमध्ये मराठी भाषेचा वापर अनिवार्य केला आहे. या संदर्भात जिल्हाधिकारी विनय गौडा यांनी नाशिकमध्ये सीईओ असताना मराठी शिकण्याच्या अनुभवांची आठवण सांगितली. या कार्यक्रमात चंद्रपूर श्रमिक पत्रकार संघाचे अध्यक्ष प्रशांत विघ्नेश्वर, सचिव प्रविण बतकी यांच्यासह अनेक मान्यवर उपस्थित होते. जिल्हाधिकाऱ्यांचे शाल आणि पुष्पगुच्छ देऊन स्वागत करण्यात आले. कार्यक्रमाचे संचालन बाळू रामटेके यांनी तर आभार प्रविण बतकी यांनी मानले. शहराच्या विकासासाठी रस्ते दुरुस्ती, प्रदूषण नियंत्रण, गरीबांसाठी गृहनिर्माण आणि प्रशासनाच्या कार्यपद्धतीबाबत पत्रकारांनी विचारलेल्या प्रश्नांना जिल्हाधिकाऱ्यांनी सविस्तर उत्तरे दिली. या चर्चेतून प्रशासनाच्या आगामी योजना आणि धोरणांबाबत नागरिकांना महत्त्वाची माहिती मिळाली.