प्रकल्पग्रस्त उपाशी, बनावट कागदपत्रे देऊन नोकरी लागलेले तुपाशी

अंबुजा सीमेंट येथील एक ठेकेदार सुपरवायझरचा प्रताप

विजयक्रांति कंत्राटी कामगार संघटनेचा प्रकल्पग्रस्त आणि स्थानिक बेरोजगारांवर अन्याय केल्याचा आरोप

प्रकल्पग्रस्त गावकऱ्यांनी आमदारकडे ठेकेदार व कंपनीच्या भ्रष्ट अधिकाऱ्यांविरुद्ध कार्यवाहीची केली मागणी

आमचा विदर्भ - धनराजसिंह शेखावत तालुका या प्रतिनिधी

गडचांदूर (दि. १५ मे २०२३) -

        अंबुजा सिमेंट (Ambuja Cement) येथे तात्पुरत्या लोडर भरतीमध्ये 12 गावातील बेरोजगारांना डावलून त्यांच्या नावाखाली खोट्या युवकांचे नावे देऊन ठेकेदार व त्याच्या सुपरवायझर कडून कंपनीची दिशाभूल केल्यामुळे स्थानिक बेरोजगार युवकांची फसवणूक होत असल्याचा मोठा दावा विजयक्रांति कंत्राटी कामगार संघटनेचे महासचिव बबन आत्राम यांनी केला आहे. (Vijaykranti Contractual Workers Union) (gadchandur)

        स्वयंघोषित युनियनच्या पधाधिकाऱ्यांनी ग्रामपंचायत हरदोना, नगरपरिषद गडचांदूर यांचे कडून योग्य माहिती गोळा न करता हरदोना खुर्द, नगरपरिषद गडचांदूर हद्दीमध्ये रहिवासी नसलेल्या आणि अंबुजा सिमेंटच्या प्रकल्पग्रस्त बारागावा पैकी भेदोळा हे गाव नसताना तेथील एका युवकाला तात्पुरते लोडर म्हणून भरती केले. तथाकथित कामगार संघटनेच्या पदाधिकाऱ्याने एक ठेकेदार आणि त्यांच्या साईट सुपरवायझर सोबत व पॅकिंग प्लांट विभागाचे काही अधिकाऱ्यांना हाताशी धरून बनावटी कागदपत्र तयार करून प्रकल्पग्रस्त गावातील बेरोजगार युवकांना वगळत आर्थिक लाभापोटी हे कार्य केले असल्याचा आरोप विजयक्रांति कंत्राटी कामगार संघटनेचे महासचिव बबन आत्राम यांनी केला आहे. 

        सन 2014 पासून आजपर्यंत अशाच प्रकारे खोटे व बनावटी प्रकल्पग्रस्त त्याप्रमाणे स्थानिक बारा गावातील बेरोजगार युवक असल्याचे बनावटी कागदपत्र तयार करून यापूर्वी सुद्धा 44 लोकांना आर्थिक लाभ घेऊन पैकिंग प्लांटमध्ये नोकरी देण्यात आली होती. त्यामध्ये स्थानिक बारा गावातील बेरोजगार प्रकल्पग्रस्त युवाकांवर सातत्याने अन्याय करण्यात आला. अशा प्रकारच्या बनावटी कागदपत्र बनविण्यास कंपनीच्या काही अधिकाऱ्यांना तथाकथित स्वयंघोषित युनियनच्या पदाधिकाऱ्यांना लाभ पोहोचविण्याचे कार्य केल्याचा आरोपही बबन आत्राम यांनी केला आहे. या संदर्भात एक ठेकेदार व त्याच्या सुपर्वाइजर आणि बनावटी कागदपत्राला मान्यता देऊन 44 प्रकल्पग्रस्त आणि स्थानिक बेरोजगार युवकांवर अन्याय करणाऱ्या कंपनी प्रशासन विरुद्ध कार्यवाहीची मागणी विजय क्रांती कामगार संघटनेने राज्य शासनाकडे केली आहे. या प्रकरणाची गांभीर्य लक्षात घेता विजयक्रांती कामगार संघटनेने कंपनी प्रशासनाला डिसेंबर 2021 रोजी पत्र देऊन चौकशीची मागणी केली होती, परंतु कंपनी प्रशासनाचे या गैरप्रकारामध्ये मिलीभगत असल्याने खोट्या व बनावटी कागदपत्राच्या आधारे नोकरी मिळालेल्या युवकांवर अजूनही कारवाई प्रलंबित आहे. 

        जुन्या घटनेचे गांभीर्य लक्षात न घेता आता परत 10 मे 2023 रोजी तथाकथित स्वयंघोषित युनियनच्या पदाधिकाऱ्यांनी कंपनी व्यवस्थापन व ठेकेदाराने हाथ मिळवणी करून भेदोडा, हरदोना खुर्द व गडचांदूर येथील रहिवाशी असलेल्या नागरिकांची बनावटी कागदपत्र तयार करून तीन युवकांना टेम्पररी लोडर म्हणून नियुक्त करण्याचे गोड पाप या लोकांनी केले आहे. यांच्या अशा बेजाबाबदार कृत्यांमुळे अंबुजा सिमेंटच्या 12 प्रकल्पग्रस्त गावातील प्रकल्पग्रस्त व युवा बेरोजगार यांच्यावर अन्याय होत आहे. 

        स्थानिक आमदार आणि महाराष्ट्र राज्य विधान मंडळात अंबुजा सिमेंटच्या या विषयावर तारांकित प्रश्न लावून घडलेल्या प्रकाराची उच्चस्तरीय समितीच्या मार्फत चौकशी करून ठेकेदारा व कंपनीच्या भ्रष्ट अधिकाऱ्यां विरुद्ध कार्यवाही करण्याची आ. धोटे यांच्या कडे मागणी करण्यात आली आहे.